ئه‌مڕۆ شه‌ممه‌، نێچیرڤان بارزانی، سه‌رۆكی هه‌رێمی كوردستان، له‌ به‌غدا به‌شداری له‌ ڕێوڕه‌سمی یادی بیست و یه‌ك ساڵه‌ی شه‌هیدكردنی (ئایه‌توڵلا محه‌مه‌د باقر ئه‌لحه‌كیم)دا كرد كه‌ به‌ ئاماده‌بوونی سه‌ركۆمار و سه‌رۆك وه‌زیران و سه‌رۆكی ئه‌نجومه‌نی باڵای دادوه‌ریی عێراق و ژماره‌یه‌كی به‌رچاوی سه‌ركرده‌ سیاسییه‌كانی عێراق و دیپلۆماتكاران و میوانان به‌ڕێوه‌ چوو.
نووسینگه‌ی راگه‌یاندنی سه‌رۆكی هه‌رێمی كوردستان له‌راگه‌یه‌ندراوێكدا بڵاویکردەوە: له‌ ڕێوڕه‌سمه‌كه‌دا نێچیرڤان بارزانی سه‌رۆكی هه‌رێمی كوردستان وتارێكی پێشكه‌ش كردو له‌به‌شێكی وتاره‌كه‌دا هاتووه‌" ئەمڕۆ پێكه‌وه‌ لە یادێکی گرنگدا بەشدارین، کە ڕۆژی شەهیدی عێراقی و یادی (21) ساڵەی شەهیدکردنی ئایەتوڵڵا محەمەد باقر حەکیمه‌ (قُدِّسَ سِرُّهُ). گەلی عێراق بۆ ڕزگاربوون لە چەوسانەوە و لەناوبردنی تیرۆر، زۆر شەهیدی داوە. باشترین وەفاداری بۆ یاد و ڕۆحی شەهیدان، گەشەپێدانی ئاوەدانی و خۆشکردنی ژیان و گوزه‌رانی خەڵکی عێراق و دابینکردنی دواڕۆژێکی گەشە بۆ نەوەی ئێستا و داهاتوو.
شەهیدی میحراب، شەهیدی دەستی تیرۆر، ئایەتوڵڵا محەممەد باقر حەکیم، لە دوورەوڵاتیدا، ڕابەر و هاندەرێکی سەرەکیی یەکبوونی خەبات و کاری پێکەوەییی لایەنەکانی ئۆپۆزیسیۆنی عێراقی بوو. یەکبوونی ئەوكات، بۆ ڕزگارکردنی گەل بوو لە چەوساندنەوە و له‌ دیکتاتۆری.
ئێستا ئێمه‌ کە لە عێراقی ئازادکراو لە دیکتاتۆری، یادی شەهید ئایەتوڵڵا محەمەد باقر حەکیم دەکەینەوە، دەبێ بە دوو شێوە، بە کردەوە وەفاداریی خۆمان بۆ شەهیدی میحراب و هەموو شەهیدان نیشان بدەین. ئەویش به‌ نەهێشتنی هەموو جۆرێكی چەوساندنەوە و ناعه‌داله‌تی، له‌گه‌ڵ دوورکەوتنەوەی هەموو حزب و لایەنە سیاسییەکان، لە گواستنەوەی ڕکابەری و ناکۆکیی سیاسیی نێوانیان، بۆ ناو کۆمەڵگە و نەتەوە و پێکهاتەکانی تری عێراق.
هه‌روه‌ها سه‌رۆكی هه‌رێمی كوردستان وتی" جگە لەو ڕابردووە، ئەمڕۆ ئێمه‌ سەرچاوەیەکی گرنگ و گەورەی یاساییمان هەیە بۆ پێشکەوتن و بەهێزکردنی پێکەوەژیانی هاوبەشی پێکهاتەکانی عێراق. لە ساڵی ٢٠٠٥ـەوە دەستوورێکمان هەیە. ڕۆحی ده‌ستوور بریتییە لە دروستکردنی دیموکراسی، دادپەروەری و دابەشکردنی دەسەڵات و سیستەمی فیدرالی. جێبەجێکردنی دەستوور وەک خۆی، ڕابردووی جوانی کۆمەڵگەمان دەپارێزێت و ئێستا و داهاتووشمان باشتر دەکات.
بۆیه‌ ئێستا کە لێرە زۆر لە به‌ڕێزان سەرکردە و بەرپرسانی گەورەی عێراقی دانیشتوون، داوا دەکەم هەموومان پێکەوە پابەندی ئەو دەستوورە بین. دەستوور، یەکسانیی هەموو پێکهاتە و هەرێم و پارێزگاکانی عێراق و سه‌قامگیریی وڵات دەپارێزێت.
بەڕێزان..
ئێستا له‌به‌ر نەبوونی بودجە و مووچە لە هەرێمی کوردستان، فەرمانبەران و خەڵک لە دۆخێکی زۆر خراپدا دەژین. ئەوە کاریگەرییەکی زۆر خراپی کردووەتە سەر هەموو کەرتەکان لە هەرێمی کوردستان. زۆر پێویستە ئەو کێشە گەورەیە، بە زوویی چارەسەر بکرێت. ئەمەش بەرپرسیاریه‌تیی هەموومانە، چونکە هەرێمی کوردستان و فەرمانبەرانی هه‌رێمی كوردستان، بەشێکن لە عێراق.
بۆیه‌ داوا لە ته‌واوی سەرکردە و لایەنە سیاسییەکان، فراکسیۆنەکان و هه‌موو ئەندامانی ئەنجومەنی نوێنەرانی عێراق دەکەم، پشتیوان بن بۆ چاره‌سه‌ركردنی كێشه‌ی بودجه‌ و مووچەی فەرمانبەرانی هەرێمی کوردستان.
بەڕێزان..
حکوومەتی عێراقی فیدراڵی بە سەرۆکایەتیی برای بەڕێزمان محەمەد شیاع سوودانی، بە باشی کاری کردووە، ئەوەش پێگەی عێراقی بەهێز کردووە. ئەو شێوە کارکردنە، دەتوانێ پێگەی عێراق بەهێزتریش بکات. بەڵام پێشێلکردنی دەسەڵاتی فەرماندەی گشتیی هێزە چەکدارەکانی عێراق بە هێرش بۆ سەر نێرده‌ دیپلۆماسییه‌كان و هێزه‌كانی هاوپەیمانان و پێشمەرگە، کاری حکوومەت تێکدەدات و ئاڵۆزییەکی زۆر و هەمەلایەنە لە عێراق دروست دەکات.
ئەو هێرشانە زیانێکی زۆریان بە ئاسایش و ژیانی خەڵکی هەرێمی کوردستان گەیاندووە، بووه‌ته‌ هۆی ئه‌وه‌ی دڵەڕاوکێ بە هەموو بازاڕی عێراقدا بڵاو ببێته‌وه‌، هەروەها دەرفەتی داوەتە تیرۆریستانی داعش کە هێرشەکانیان زۆرتر بکەن.
هێزەکانی هاوپەیمانان لەسەر داوای عێراق بۆ بەرەنگاربوونەوەی داعش هاتوون. پێویستە دەرفەت بدرێتە حکوومەتی فیدرالی و به‌ڕێز سەرۆک وەزیران سوودانی بەپێی پلانێکی هاوبەش و له‌ زه‌مینه‌یه‌كی ئارام و بێ كێشه‌دا گفتوگۆیان له‌‌گه‌ڵدا بكات، بۆ ڕێككه‌وتن له‌سه‌ر داهاتووی هاریكاریی نێوان هێزه‌كانی هاوپه‌یمانان و عێراق.
عێراق دەوڵەتێکی خاوه‌ن دەزگای نیشتمانیییه‌، دەبێ ئەو دەزگایانە کاری خۆیان بکەن، بە پێچەوانە خەڵکی عێراق دەخرێتە کێشە و ئاڵۆزیی تازەوە، لە کاتێکدا عێراق ئێستا زیاتر لە هەموو شتێکی دیکە پێویستی بەوەیە سەقامگیرییەکەی تێک نەدرێت.