ڕێککەوتن لەنێوان حکومەتی هەرێم و تورکیا هەیە لە لەشکرکێشی تورکیا بۆ خاکی هەرێمی کوردستان

23:20 2024-07-14 98921 كوردستان 0

2024-07-14

98921

لاهور تاڵەبانی دەڵێت: ڕێککەوتن لەنێوان حکومەتی هەرێم و تورکیا هەیە لە لەشکرکێشی تورکیا بۆ خاکی هەرێمی کوردستان.
ئەمڕۆ یەکشەممە، لاهور شێخ جەنگی سەرۆكی جوڵانەوەی بەرەی گەل لە لێدوانێکی میدیایی گوتوویەتی: "بێدەنگی حکومەتی هەرێم و حکومەتی عێراق جێی تێڕوانینە و پێدەچێت هاوکاریان هەبێت لەگەڵ لەشکرکێشی سوپای تورکیا، بەداخەوە سوپای تورکیا بووە هۆی ئاوەرەکردنی سەدان گوند و مەترسی ئەوە هەیە کە لە هاتنی نەکشێتەوە".
لاهور شێخ جەنگی لە وەڵامی پرسیارێک سەبارەت بە مەترسی لەشکرکێشی تورکیا بۆ سەر هەڵبژاردنی پەرلەمانی هەرێمی کوردستان وتی: هیوادارم کە مەترسی لەسەر هەڵبژاردن نەبێت، بەداخەوە ئەمە چوارەمین جارە هەڵبژاردن دوابخرێت.

چەندین ساڵە سوپای تورکیا لە خاکی هەرێمی کوردستان بوونی هەیە و زیاتر لە چل بارەگای سەربازی بۆخۆی و هێزەکانی لە پارێزگای دهۆک و ڕۆژهەڵاتی هەولێر دروستکردووە بە بیانوی بوونی پارتی کرێکارانی کوردستان، لەکاتێکدا هێرشە فڕۆکەوانیەکانی تورکیا بوونە هۆی کوژرانی زیاتر لە 130 هاوڵاتی سڤیلی هەرێمی کوردستان لەماوەی هەشت ساڵی ڕابردوودا و لەسەرتای ئەمساڵ بەگوێرەی ڕێکخراوەی CPT ئەمریکی، دە هاوڵاتی مەدەنی لە هەرێمی کوردستان بەهۆی هێرشەکانی تورکیا گیانیان لەدەستداوە کە ئەمانە تەنها ژمارەی ڕاگەیندراوەکانە، لەبەرامبەردا چەندین هاوڵاتی تری مەدەنی لە شەنگال لە ڕۆژئاوای پارێزگای نەینەوا کراونەتە ئامانج.