عه‌بدوڵا حاجی مه‌حمود راگه‌یه‌ندراوێكی له‌باره‌ی كۆنگره‌ی سۆسیال دیموکرات بڵاوكرده‌وه‌

14:09 2024-04-04 28679 كوردستان 0

2024-04-04

28679

عه‌بدوڵا حاجی مه‌حمود كه‌ خۆی وه‌ك جێگری سه‌رۆكی پارتی سۆسیال دیموكرات ناساندوه‌ سەرباری ئەوەی دورخراوەتەوە رایگه‌یاند، بە ئیرادەی تاکڕەوانەی چەند کەس و گروپێک بەناوی بەستنی کۆنگرەی نائاسایی پارتی سۆسیال دیموکرات "شانۆگەریەکی بێ بنەما ساز دەکرێت"، ده‌شڵێت، "لەئه‌مڕۆ بەدواوە ئێمە هیچ بەرپرسیارێتیەکی ئەو ئاینده لێڵ و نارونە هەڵناگرین".

له‌ راگەیەندراوێکدا كه‌ لەلایەن عه‌بدوڵا حاجی مه‌حمود و ئەو ئەندامانه‌ی مەکتەبی سیاسی و ئەنجومەنی سەرکردایەتی كه‌ له‌ پارتی سۆسیال دیموکراتی کوردستان دورخراونه‌ته‌وه‌، هاتوە، "ئەمڕۆ لەهەنگاوێکی دور لە هەمو پڕەنسیپێکی کاری سیاسی و حزبی، بە ئیرادەی تاکڕەوانەی چەند کەس و گروپێک بەناوی بەستنی کۆنگرەی نائاسایی پارتی سۆسیال دیموکراتی کوردستان شانۆگەریەکی بێ بنەما ساز دەکرێت".
ئاماژه‌ی به‌وه‌شكردوه‌، "بێ بنەمایە چونکە کۆنگرە ئامڕازێکی یاسایی و پەیڕەوییە بۆ نوێکردنەوە و بەزیندو هێشتنەوەی ژیانی حزبی و پێکهاتە و ئۆرگانەکانی و بەرنامە و سیاسەتی حزب، بەڵام ئەوەی بەناوی کۆنگرەی نائاسایی پارتی سۆسیال دیموکراتی کوردستانەوە دەگوزەرێت دورە لە هەمو بنەماکانی کۆنگرەیەکی تەندروست و ئامانجدار بۆیە پێمان وایە نەک خزمەت بە پارتی سۆسیال دیموکراتی کوردستان ناکات بەڵکو کۆتایی بە پڕەنسیپەکانی کاری هاوبەش و بیروڕای جیاواز لەو حزبەدا دەهێنێت و بەرەو تولە رێیەکی نادیار و داخراوی دەبات".
لە راگەیەندراوەکەدا ئه‌وه‌شخراوه‌ته‌ڕو، "لەئه‌مڕۆ بەدواوە ئێمە هیچ بەرپرسیارێتیەکی ئەو ئاینده لێڵ و نارونە هەڵناگرین و بۆ درێژەدان بە مێژوی حزب و قوربانیدانی شەهیدان و ئامانجە باڵاکانیان ڕێگای خەباتی سیاسی و جەماوەریی دور لە گیانی توند و تیژی و دەمارگیری درێژە پێدەدەین".

له‌ راگه‌یه‌ندراوه‌كه‌دا باس لەوەشکراوە، "لە هەنگاوی یەکەمدا بەهاوپەیمانییەک بەناوی سەردەم خۆمان بۆ هەڵبژاردنی داهاتوی پەرلەمانی کوردستان ساز و ئامادە دەکەین، بۆ داهاتوی نزیک و دوریش لەسەر بنەمای بەهای باڵای خەبات و خزمەتکردنی گەل و نیشتیمان و کاری هاوبەش و رەخساندنی دەرفەتی هاوتا بۆ ئەو ئامانجانە کارنامەی تۆکمەمان دەبێت بۆ درێژەدان بەو کاروانی تێکۆشانەی خۆمان لەڕێکخستنیدا ماندو بوین و قوربانی گەورەمان لەپێناوداوە".