مه‌سعود بارزانی، سه‌رۆكی پارتی دیموكراتی كوردستان رایگه‌یاند، پارتی بایكۆتی هەڵبژاردنی نەكردوە بەڵكو لەگەڵ هەڵبژاردنێكی پاك و بێگەرد و شەفاف و جێگەی دڵنیایی و دور لە دەستوەردانی دەرەكی و بەرنامەی پێشوەختەیە كە تێیدا دەنگدەران لە مافی دەنگدان بێبەش نەكرێن و پڕۆسەی دیموكراسی بێ بەها نەكرێت و یاساکانی هەرێم پێشێل نەکرێن.

به‌گوێره‌ی راگه‌یه‌ندراوێكی باره‌گای بارزانی، ئه‌مڕۆ چوارشەممە مه‌سعود بارزانی لە سەلاحەددین پێشوازی لە خاتو ئالینا رۆمانۆوسكی، باڵیۆزی ئەمریكا لە عێراق كرد و باڵیۆزی ئەمریكا نیگەرانیی خۆی و وڵاتەكەی لە دوا پێشهاتە سیاسیەكان دەربڕی و داواشی كرد كە پارتی دیموكراتی كوردستان ڕۆڵی خۆی ببینێت و لەگەڵ لایەنەكانی تر پێكەوە كێشە و نیگەرانی و تێبینیەكانی پەیوەست بە هەڵبژاردنەكانی هەرێم چارەسەر بكەن.
له‌ كۆبونه‌وه‌كه‌دا مه‌سعود بارزانی ئاماژەی بە هۆكارەكانی دەرچونی بەیاننامەكەی پارتیدا و ڕونیکردەوە، "هەر لە سەرەتای نەوەدەكانی سەددەی ڕابردو پارتی دەستپێشخەری بەڕێوەچونی هەڵبژاردن بوە و خۆی لە ساڵی 1991 داوای كردوە كە پێویستە شەرعیەتی شۆڕشگێڕی جێگەی خۆی بداتە شەرعیەتی دەستوری و هەڵبژاردن بكرێت".
ئاماژه‌ی به‌وه‌شكرد، پارتی هەمیشە لەگەڵ ئەنجامدانی هەڵبژاردن بوە ترسی لە هەڵبژاردن نیە بەڵكو تێبینی لەسەر شێوازی هەڵبژاردن و مەترسیی تێكدانی بنەماكانی پێكەوەژیان و نەهێشتنی بەشداریی پێكهاتەكان لە ژیانی سیاسیدا هەیە، "بە بیانوی جۆراوجۆر دوساڵ هەڵبژاردنیان دواخست، دەستی نامۆ و دەرەكی خرانە ناو ئەو بابەتە و لە بەها و پێگەی هەرێمیان كەم كردەوە، هەروەها بە شێوەیەکی نا دەستوری و نایاسایی بڕیار و یاساکانی هەرێمی کوردستانیان گوڕی و ستەمێکی گەورەیان لە پێكهاتەكان و تێكڕای خەڵكی كوردستان كرد".
مه‌سعود بارزانی باسی له‌وه‌شكردوه‌، "پارتی بایكۆتی هەڵبژاردنی نەكردوە بەڵكو لەگەڵ هەڵبژاردنێكی پاك و بێگەرد و شەفاف و جێگەی دڵنیایی و دور لە دەستوەردانی دەرەكی و بەرنامەی پێشوەختەیە كە تێیدا دەنگدەران لە مافی دەنگدان بێبەش نەكرێن و پڕۆسەی دیموكراسی بێ بەها نەكرێت و یاساکانی هەرێم پێشێل نەکرێن".
له‌ راگه‌یه‌ندراوه‌كه‌دا هاتوه‌، بارزانی ئاماژەی بە پەیوەندییەكانی نێوان هەولێر و بەغدا دا وە ئەوەی خستەڕو، كە "ڕێككەوتنێكی ڕون و هەمەلایەنە لەگەڵ چوارچێوەی هەماهەنگی لەژێر ناوی ئیئتیلافی دەوڵەت هەیە كە بەداخەوە هیچ یەك لە خاڵە گرنگەكانی ئەو ڕێككەوتنامەیە جێبەجێ نەكراوە". 
رونیشیكرده‌وه‌، "ڕێككەوتنەكە لەپێناو ئەوە بو كە سەقامگیری بێتەدی و خەڵك بگاتە خوشگوزەرانی و بنەماكانی شەراكەت و تەوازون و تەوافوق پیادە ببن، بەڵام هیچ یەك لەمانە نەكران، لە ڕاوێژ و هەماهەنگیی بەردەوامدا دەبین بۆ چارەسەركردنی كێشەكان و نەهێشتنی نیگەرانییەكان".