سودانى پێشوازی لە وەزیری دەرەوەی هۆڵەندا دەکات

18:21 2024-02-06 33593 عێراق 0

2024-02-06

33593

سەرۆکی ئەنجومەنی وەزیران محەمەد شەیاع سودانی، ئەمڕۆ سێشەممە پێشوازی کرد لە وەزیری دەرەوەی هۆڵەندا خاتوو هانکى بروینسلۆت و شاندەکەی یاوەری کە تیایدا تاوتوێی پەیوەندییەکانی نێوان هەردوو وڵاتی دۆست و گرنگی بەهێزکردنی هەماهەنگییان کرد لەسەر ئاست و بوارە جۆراوجۆرەکان.

نوسينگەی راگەیاندنی سەرۆک وەزیران لە راگەیەندراوێکدا بڵاویکردەوە:-لە میانەی دیدارەکەدا سودانی جەختی لەسەر پەرۆشی عێراق کردەوە بۆ پەرەپێدانی پەیوەندییەکان بەتایبەتی لە بواری ئابووری و سوود وەرگرتن لە ئەزموونی هۆڵەندا لە بواری کشتوکاڵ و ئاودا و هەڵوێستەکانی هۆڵەندا و هەوڵەکانی بەرزنرخاند لە ئاگربەست و هێرشەکانی سەر غەزە و پشتیوانیکردنی مرۆیی و فریاگوزاری بۆ گەلی فەڵستین لە دۆخی سەختی مرۆییاندا.

سودانی ئاماژەی بە پەرۆشی حکومەت کرد بۆ بەردەوامبوون لە هەماهەنگی لەگەڵ نێردەی ناتۆ لە عێراق کە هۆڵەندا لە ناوەڕاستی ئەمساڵدا سەرۆکایەتی دەکات، هەروەها پێویستی بەردەوامبوونی پەیوەندی ڕاستەوخۆ لەگەڵ نێردەکەدا هاوکات لەگەڵ دەستپێکردنی ئەو وتوێژەی کە دەبێتە هۆی کۆتایی هێنان بە ئەرکەکانی بوونی هاوپەیمانی نێودەوڵەتی بۆ بەرەنگاربوونەوەی داعش و بەردەوامبوون لە هەماهەنگیکردنی ئەو هاوکارییانەی کە لەلایەن نێردەی ناتۆوە پێشکەش دەکرێن لە بوارەکانی مەشق و ڕاهێنان و ڕاوێژکردن بۆ هێزە ئەمنییەکانمان، ئەمەش لە چوارچێوەی گەشەی ئاشکرای تواناکانی هێزە چەکدارەکانی عێراق و شکستهێنان بە پاشماوەکانی داعشدا کە چیتر مەترسی دروست ناکەن بۆ سەر دەوڵەتی عێراق.

سەرۆک وەزیێان باسی لە ئەگەری هەماهەنگی دوو قۆڵی کرد لە بواری بەندەرەکاندا لەگەڵ پێشکەوتنی بەردەوام لە تەواوکردنی بەندەری فاو و پەیوەندییەکانی لەگەڵ دەستپێکردنی پڕۆژەی ڕێگای گەشەپێدانی ستراتیژی و پێشوازی لە بەشداریکردنی کۆمپانیا هۆڵەندییەکان کرد لەم پڕۆژانەدا.

لە لای خۆیەوە، وەزیری بروینسلۆت خواستی حکومەتی وڵاتەکەی دەربڕی بۆ سەردانەکەی سەرۆکی ئەنجومەنی وەزیران بۆ ئەمستردام لە داهاتودا، کە بە دەرفەتێکی دەزانێت بۆ بەهێزکردنی هەماهەنگی و هاوبەشی دوو قۆڵی و هەڵوێستی هۆڵەندای دووپاتکردەوە سەبارەت بە پشتیوانیکردن لە هەوڵەکانی ئاگربەست لە غەزە و ڕێگریکردن لە بڵاوبوونەوەی ململانێکان لە ناوچەکەدا و کردنەوەی ڕێگا بۆ گەیاندنی یارمەتییە مرۆییەکان و هەوڵەکانی فریاگوزاری.

هەروەها هەڵوێستی خۆی دەربڕی بۆ بەردەوامبوون لە وتوێژی نێوان عێراق و هاوپەیمانی نێودەوڵەتی و کۆتاییهێنان بە بوون و ئەرکەکانی و هەنگاونان بەرەو پەیوەندییە دوو قۆڵییەکان لەگەڵ وڵاتانی هاوپەیماندا.