سەرۆک وەزیران لە داڤۆس لەگەڵ سەرۆکی فەرەنسا کۆدەبێتەوە

23:42 2024-01-17 28400 عێراق 0

2024-01-17

28400

سەرۆکی ئەنجومەنی وەزیران مەحەمەد شەیاع سودانى لەگەڵ سەرۆکی فەڕەنسا ئیمانوێل ماکرۆن کۆبووەوە لە پەراوێزی بەشداریکردنیدا لە کۆڕبەندی ئابووری داڤۆس کە لە سویسرا بەڕێوەدەچێت، لە میانەی کۆبوونەوەکەدا تاوتوێی بارودۆخی ئەمنی و سیاسی ناوچەکە کرا لەگەڵ پەیوەندییە دوو قۆڵییەکانی نێوان هەردوو وڵات و چۆنیەتی بەهێزکردنیان.

نوسينگەی راگەیاندنی سەرۆک وەزیران لە راگەیەندراوێکدا بڵاویکردەوە:هەردوولا دەرفەتەکانی هەماهەنگیان خستەڕوو لەبوارەکانی ئابووری و پەرەپێدانی توانا سەربازییەکانی عێراق و جێبەجێکردنی گرێبەستی پڕچەککردن لەگەڵ کۆمپانیای تالیسی فەڕەنسی و فراوانکردنی هاوبەشی لە بواری نەوتدا و بەهێزکردنی گرێبەستە جۆراوجۆرەکان لەگەڵ کۆمپانیای تۆتاڵ و کۆمپانیا گەورەکانی دیکەی فەڕەنسا.

سودانی ئاماژەی بە پەرەپێدانی توانا تەکنیکی و مەیدانییەکانی هێزە چەکدارەکانی عێراق کرد بە هەموو جۆرەکانیەوە لەگەڵ چەسپاندنی سەرکەوتنەکان بەسەر تیرۆرستانی داعشدا کە ڕێگا دەکاتەوە بۆ هەنگاونان بۆ کۆتایی هێنان بە ڕۆڵی هاوپەیمانی نێودەوڵەتی لە بەرەنگاربوونەوەی داعشدا و درێژەدان بە هاوکارییە ئەمنی و سەربازییە دووقۆڵییەکان لە نێوان عێراق و ئەو وڵاتە دۆستانەی کە لە شەڕی دژ بە تیرۆر پشتیوانیان کرد.

هەر لە کۆبوونەوەکەدا تاوتوێت بارودۆخی ئێستای غەزە و بەردەوامی دەستدرێژییەکان بۆ سەر گەلی فەڵەستین کرا، هاوکات بەڕێز سودانی جەختی لەسەر ڕۆڵی فەڕەنسا و کۆمەڵگەی نێودەوڵەتی و وڵاتانی چالاکی گەورە کردەوە لە کارکردن بۆ ڕاگرتنی مەینەتییەکان و ڕێگریکردن لە لەناوبردنی فەڵەستینییەکان و دۆزینەوەی چارەسەرێکی ڕیشەیی بۆ ئەو بابەتە کە مافی گەلی فەڵەستین لەسەر خاکە مێژووییەکەی خۆی مسۆگەر بکات.