سەرۆک کۆمار و سەرۆکی هەرێم جەختدەکەنەوە لەچارەسەرکردنی کێشەی مووچەخۆرانی هەرێم

12:25 2024-01-14 41975 عێراق 0

2024-01-14

41975

سەرۆک کۆمار دکتۆر لەتیف جەمال رەشید لە بەغدا پێشوازیکرد لە نێچیرڤان بارزانی سەرۆکی هەرێمی کوردستان و وەفدی یاوەری.

نوسینگەی راگەیاندنی سەرۆکایەتی کۆمار لە راگەیەندراوێکدا بڵاویکردەوە:لەدیدارەکەدا، کە ئەمڕۆ یەکشەممە , بەڕێوەچو، باس لە بارودۆخی گشتی و دوایین پێشهاتە ئەمنی و سیاسییەکانی وڵات کرا و جەختیان لە گرنگی بەهێزکردنی ئاسایش و سەقامگیری و هەماهەنگی و هاوکاری کردەوە لەپێناو دابینکردنی خواست و پێداویستییەکانی هاووڵاتیان و باشترکردنی ئاستی بژێوی و خزمەتگوزارییەکان.

سەرۆک کۆمار جەختی کردەوە لەسەر بایەخی چارەسەرکردنی پرسە هەڵپەسێردراوەکانی نێوان حکومەتی فیدراڵی و هەرێمی کوردستان بەپێی دەستور و یاسا، هەروەها پێویستی دابینکردنی شایستە داراییەکانی هەرێمی کوردستان بەگوێرەی بودجەی پەسەندکراو و یەکلاییکردنەوەی دۆسێی موچەی فەرمانبەرانی هەرێمی دوپاتکردەوە.

هەر لە دیدارەکەدا پێویستی بەردەوامبوونی دیدار و راوێژکردن لەنێوان هەردوولا لەسەر پرسە جێبایەخە هاوبەشەکان و یەکخستنی هەوڵی هێزە سیاسییەکان بۆ پشتیوانیکردنی حکومەت لە بەدیهێنانی کارنامەکەی، بەشێوەیەک کە سەروەریی عیراق و بڕیاری سەربەخۆ بپارێزێت، دوپاتکرایەوە.

لەلایەن خۆیەوە سەرۆکی هەرێم رونکردنەوەیەکی سەبارەت بە ئەنجامەکانی دیدارەکانی لەگەڵ سەرۆکی فراکسیۆنە سیاسییەکان لە میانەی سەردانەکەی ئێستایدا بۆ بەغدای پایتەخت خستەڕو، ستایشی رۆڵی سەرۆک کۆماری کرد لە نزیککردنەوەی بۆچوونی لایەنە سیاسییەکان و هەوڵەکانی بۆ دەستەبەرکردنی مافەکانی هەموو هاونیشتمانیان بە هەرێمی کوردستانیشەوە.