بەڕێوەبەرایەتی توندوتیژی سلێمانی کچێکی ڕزگارکرد دوای ڕفاندنی بۆ شاری دهۆک

16:44 2023-08-01 32653 حەوا 0

2023-08-01

32653

بەڕێوەبەرایەتی توندوتیژی سلێمانی، ڕزگارکردنی کچێکی ڕایگەیاند دوای ڕفاندنی بۆ شاری دهۆک.
ئەمرۆ سێشەممە، بەڕێوەبەرایەتی توندوتیژی سلێمانی ڕایگەیاند، "یەكێك لە نوسینگەكانی سنوری پارێزگای سلێمانی سەر بە بەڕێوەبەرایەتی بەرەنگاربوونەوەی توندوتیژی دژی ئافرەتان‌و خێزان ئاگاداركرایەوە كە كچێكی نەوجەوان كە تەمەنی تەنها 11 ساڵە لەلایەن كوڕێكەوە هەڵخەڵەتێنراوە‌و بەرەو سنوری هەولێر‌و دهۆك هەڵهاتوون". ڕوونیکردەوەش کە لە ماوەیەكی كەمدا بەڕێوەبەرایەتی بەرەنگاربوونەوەی توندوتیژی دژی ئافرەتان‌و لە دهۆك ئاگاداركردەوە توانرا بە هاوكاری بەڕێزیان‌و بە هەماهەنگی ئاسایشی دهۆك لە ماوەی چەند كاتژمێرێكی كەمدا لە سنووری پارێزگای دهۆك دەستگیر بكرێن دواتر دەگوازرینەو بۆ هەولێر‌ و پاشان لە ڕێگەی دەزگای ئاسایشی هەولێرەوە دەگەڕێنرێنەوە بۆ سلێمانی.
بەگوێرەی بەیاننامەیەکی بەڕێوەبەرایەتی توندوتیژی دژی ئافرەتانی سلێمانی، "پاش مانەوەی كچە نەوجەوانەكە لە خانەی داڵدەدراوی ژنانی هەڕەشە لێكراو بە مەبەستی دڵنیا بوون لە سەلامەتی تەندروستی ئاگاداركردنەوەی كەس‌و كاری كە پێشتریش بەردەوام لە پەیوەندیدا بووین، دواتر باوكی كچەكە بانگ كراو لە ڕێگەی كەسانی یاسایی‌و توێژەرانی كۆمەڵایەتی‌و دەروونییەوە ڕێنمای پێدراو لە سەلامەتی كچەكەی دڵنیا كرایەوە كچەكەش باسی لەوە كرد كە تۆمەتبارەكە بە زۆر ڕفاندوویەتی هەڕەشەی كوشتنی لە خۆی‌و باوكی‌و براكەی كردووە‌و ناچاری كردووە كە بڕێك پارەش لە ماڵەوە بهێنێن بە نیازی ئەوەی كە دەچنە دەرەوەی هەرێم بۆیە ناچار شوێنی كەوتووە".
كچە نەوجەوانەكە داوای سكاڵای یاسایی كرد لە دژی تۆمەتبارەكە، لەلایەن نوسینگەیەكی سەر بە بەڕێوەبەرایەتی دڵنیا كرایەوە كە بەدواداچوون‌و چاودێری كێشەكەی دەكرێت پەڕاوی لێکۆڵینەوە بۆ تۆمەتبار کراوەتەوە.