هەسەدە: لە پێكدادنەكانی مانگی ڕابردوی لەگەڵ گروپەكانی سەر بە دیمەشق نۆ شەڕڤان شەهید بوون

20:09 2026-02-22 42764 كوردستان 0

2026-02-22

42764

هێزەکانی سوریای دیموکرات (هەسەدە) رایگەیاند لە پێكدادنەكانی مانگی ڕابردوی لەگەڵ گروپەكانی سەر بە دیمەشق لە دێرەزور، ڕەققە، تەبقا و حەسەكە نۆ شەڕڤان شەهیدبون و وتیشی، "جەخت دەکەینەوە کە خوێنی ئەوان بە فیڕۆ ناچێت و ئێمە لە سەر بەجێگەیاندنی ئەرکی نیشتمانی خۆمان بەردەوام دەبین".
‏
‏ناوەندی ڕاگەیاندنی هەسەدە ئەمڕۆ لە ڕاگەیەندراوێكدا بڵاویكردەوە، هێزەکانمان شەهیدبونی نۆ شەڕڤانمان ڕادەگەیەنن، کە لە کاتی بەرپەرچدانەوەی هێرشی گروپە چەکدارەکانی سەر بە دیمەشقدا گیانیان بەختکرد. هەڤاڵانمان لە کاتی بەجێگەیاندنی ئەرکی پاراستنی گەلەکەمان و بەرگریکردن لە دەستکەوتەکانی گەلەکەمان شەهید بون، و پابەندبونی نەگۆڕی خۆیان بە بەهاکانی ئازادی و کەرامەت دوپاتکردەوە.
‏
‏بەگوێرەی ڕاگەیەندراوەكە، ئەو شەڕڤانانە ڕوبەڕوبونەوەی پاڵەوانانەیان ئەنجامدا و ئازایەتی و پێداگرییەکی زۆریان لە تێکشکاندنی هێرشەکاندا نیشاندا، و ڕۆحی بەرپرسیارێتی خۆیان بەرامبەر بە کۆمەڵگا و دۆزە ڕەواکەیان بەرجەستە کرد. قوربانیدانی ئەوان لە چوارچێوەی بەرگرییەکی ڕەوادایە بۆ پاراستنی سەقامگیری و پاراستنی ئیرادەی گەلەکەمان.
‏
‏هەسەدە لە ڕاگەیەندراوەكەیدا دەشڵێت، "ئێمە لە کاتێکدا سەرەخۆشی لە بنەماڵەی شەهیدان و هەڤاڵانیان دەکەین، جەخت دەکەینەوە کە خوێنی ئەوان بە فیڕۆ ناچێت و ئێمە لە سەر بەجێگەیاندنی ئەرکی نیشتمانی خۆمان لە بەرگریکردن لە ناوچەکانمان و گەلەکەمان بەردەوام دەبین، تاوەکو بەدیهێنانی هەموو ئەو ئامانجانەی کە ئەوان لە پێناویدا گیانیان بەخت کرد".
‏ناسنامەی شەهیدەكان بریتیە لە؛ مەسعود داود بە نازناوی مەزڵوم عەفرین لە ڕەققە شەهیدبوە، مەحمود بەکر بە نازناوی سەربەست لە ڕەققە شەهیدبوە، هۆگر جومعە بە نازناوی زاگرۆس کۆبانێ لە دێرەزور شەهیدبوە، خەلیل داود بە نازناوی فیداکار لە تەبقا شەهیدبوە.
‏
‏هەروەها دیار موسا بە نازناوی تۆفان دێرک لە دێرەزور شەهیدبوە، ئەنوەر مستەفا بەنازناوی کلێ لە حەسەكە شەهیدبوە، بەکری مستەفا بە نازناوی ئەردال لە حەسەكە شەهیدبوە، بەنگین نەعسان بە نازناوی کارگەر لە دێرەزور شەهیدبوە، حەمودە وەلۆ بەنازناوی جانۆ ە حەسەكە شەهیدبوە.