سودانی جەخت لە کاراکردنەوەی کۆکردنەوەی کرێی کارەبا دەکات

21:04 2026-02-11 37726 عێراق 0

2026-02-11

37726

ئەمڕۆ چوارشەممە، سەرۆک وەزیران محەمەد شیاع سودانی، جەختی لە پێشینەی کارەکانی حکومەت بۆ پرسی کۆکردنەوەی کرێی کارەبا لە کەرتی کارەبا و ئامادەکردنی دیراسەی بابەتەكە كرد.
نووسینگەی ڕاگەیاندنی سەرۆک وەزیران لە بەیاننامەیەکدا کە دەستی ئاژانسی موتەڵع کەوتووە، دەڵێت: "سەرۆک وەزیران محەمەد شیاع سودانی، سەردانی بارەگای وەزارەتی کارەبای کرد لە بەغدای پایتەخت، بە مەبەستی ئاگاداربوون لە ئامادەکارییە پێشوەختەکانی وەزارەت بۆ دابینکردنی وزەی کارەبا لە وەرزی هاوینی داهاتوودا."
لە بەیاننامەکەدا هاتووە: "سەرۆک وەزیران سەرۆکایەتی کۆبوونەوەیەکی کرد کە تێیدا وەزیری کارەبا بە وەکالەت و ژمارەیەک لە ڕاوێژکاران و بەڕێوەبەرە گشتییەکانی وەزارەت ئامادەی بوون. لە کۆبوونەوەکەدا پلانی بەرهەمهێنان، گواستنەوە و دابەشکردنی وزە، چارەسەرکردنی گرفتەکانی ناو تۆڕی نیشتمانی و دۆسیەی کۆکردنەوەی کرێی کارەبا خرانەڕوو."
سودانی جەختیکردەوە: لەسەر "پێشینەیی دۆسیەی کۆکردنەوەی کرێی کارەبا و ڕۆڵی لە ڕێکخستنی بەکاربردن و کەمکردنەوەی بەفیڕۆدانی وزە"، ئاماژەی بەوەشکرد: "کۆکردنەوەی کرێ تەنها بۆ کۆکردنەوەی پارە نییە، بەڵکو ئامانج لێی دابینکردنی خزمەتگوزارییەکی بەردەوام و تەرخانکردنی داهاتەکانە بۆ نۆژەنکردنەوەی کەرتی کارەبا."
هەروەها فەرمانی دا بە "ئامادەکردنی توێژینەوەیەک لەسەر کۆکردنەوەی کرێی کارەبا، بە مەبەستی باشترکردنی کارایی وەرگرتنی داهاتەکان، کە تێیدا بڕی تێچووی کرێی کارەبا بەراورد بکرێت بە وڵاتانی دراوسێ." جەختیشیکردەوە: لەسەر "پێویستی بەدواداچوون و پێداچوونەوەی بەردەوام بە پلانەکانی وەزارەت و ڕێکارە مەیدانییەکان بۆ باشترکردنی خزمەتگوزارییەکان و گەرەنتی دابینکردنی کارەبا بۆ هاوڵاتیان، بەتایبەتی لەگەڵ نزیکبوونەوەی وەرزی هاوین."