فەیحان داوا لە سەرۆکی کوتلەکان دەکات پەلە بکەن لە پێشکەشکردنی ناوی کاندیدەکانیان بۆ لیژنە کاتییەکان

21:22 2026-01-05 31706 عێراق 0

2026-01-05

31706

ئەمڕۆ دووشەممە، جێگری یەکەمی سەرۆکی ئەنجومەنی نوێنەران، عەدنان فەیحان، داوای لە سەرۆک فراکسیۆنەکان کرد پەلە بکەن لە پێشکەشکردنی ناوی کاندیدەکانیان بۆ لیژنە کاتییەکان.
نووسینگەی ڕاگەیاندنی جێگری یەکەم لە ڕاگەیەندراوێکدا کە دەست ئاژانسی هەواڵی موتەڵع کەوتووە، ئاماژەی بەوە کردووە کە "سەرۆکایەتیی ئەنجومەنی نوێنەران، لە هۆڵی دەستوور، کۆبوونەوەیەکی فراوانی لەگەڵ سەرۆک فراکسیۆنە پەرلەمانییەکان ئەنجامدا، بە مەبەستی داڕشتنی نەخشەڕێگایەک بۆ بەهێزکردنی ئەدای یاسادانان و چاودێری لە خولی شەشەمی پەرلەماندا، هەروەها تاوتوێکردنی میکانیزمی پێکهێنانی لیژنە پەرلەمانییەکان بەپێی پێوەرەکانی لێهاتوویی و پسپۆڕی، و خشتەبەندی کردنی یاسا پێشنیارکراوەکان، بەو جۆرەی گەشەپێدانی ڕۆڵی دامەزراوەی یاسادانان و بەهێزکردنی کارە چاودێرییەکانی مسۆگەر بکات".
فەیحان داوای لە "سەرۆک فراکسیۆنەکان کرد پەلە بکەن لە پێشکەشکردنی لیستی ناوی کاندیدەکانیان لە لیژنە کاتییەکان و ڕەچاوکردنی ئەزموون و پسپۆڕی و لێهاتوویی لە هەڵبژاردندا، بەو مەرجەی بەتەمەنترین ئەندام سەرۆکایەتی کارەکانیان بکات تا کاتی پێکهێنانی حکومەت، لەگەڵ پێویستی دابینکردنی نیسابی یاسایی تێیاندا بۆ تاوتوێکردنی پێشنیار و پڕۆژە یاساکان و پێدانی ئەولەویەت بەو یاسایانەی کە ڕاستەوخۆ پەیوەندییان بە ژیانی هاووڵاتییانەوە هەیە".
ئەوەشی خستەڕوو کە "لە کۆبوونەوەکەدا ڕێککەوتن کرا لەسەر پێکهێنانی لیژنەیەک بە سەرۆکایەتی جێگری یەکەمی سەرۆکی ئەنجومەنی نوێنەران و ژمارەیەک لە سەرۆک فراکسیۆنەکان؛ بۆ لێکۆڵینەوە لە ناوی کاندیدەکان و یەکلاکردنەوەی دابەشکردنیان بەسەر لیژنەکاندا، و جەختکردنەوە لەسەر پێویستی تەواوکردنی ئەم مەلەفە لە زووترین کاتدا بۆ هەڵسەنگاندنی کارەکانی لیژنەکان و چالاککردنی ئەدای چاودێری، جگە لە لێکتێگەیشتن لەسەر خستنەڕووی کارنامەیەکی مانگانە بۆ دانیشتنەکانی ئەنجومەنی نوێنەران".