ئەمڕۆ هەینی، فەرماندەیی ئۆپەراسیۆنە هاوبەشەكان، پلانی ئەمنیی خۆی بۆ پاراستنی ناوەندەكانی هەڵبژاردن خستەڕوو، كە لە مانگی ئایاری ڕابردووەوە دەستیپێكردووە، و جەختیشیكردەوە: لە دانانی پلانێكی تەواو بۆ دوای داخستنی سندوقەكانی دەنگدان.
جێگری فەرماندەی ئۆپەراسیۆنە هاوبەشەكان و سەرۆكی لیژنەی باڵای هەڵبژاردنی ئەنجومەنی نوێنەرانی 2025 فەریقی یەكەم ڕوكن قەیس محەمەداوی، بەپێی ئاژانسی فەرمی کەموتەڵع بەدواداچوونی بۆ کردووە ڕایگەیاند: لیژنەی باڵای ئەمنی بۆ هەڵبژاردنەكان، لە كاتی پێكهێنانیەوە لە مانگی پێنجدا بە فەرمانی دیوانی، دەستی بە جێبەجێكردنی ئەركە جۆراوجۆرەكان كردووە بۆ دڵنیابوون لە بەڕێوەچوونی پرۆسەی هەڵبژاردن بە شێوەیەكی ئارام و سەقامگیر، و وتیشی: لیژنەی باڵای ئەمنی چەندین ئۆپەراسیۆنی پێشوەختەی ئەنجامداوە كە لە چەندین تەوەردا دابەشكرابوون، لەوانە ڕاوەدوونانی پاشماوەی چەتەكانی داعشی تیرۆریستی و ئەنجامدانی هێرشی ئاسمانی ورد و ئۆپەراسیۆنی زەمینی وردبینیكراو لە ناوچە دیاریكراوەكاندا، كە هاوكات بوو لەگەڵ هەوڵی هەواڵگری و چاودێری وردی ئاسمانی، ئەمەش ڕۆڵی هەبوو لە بەدەستهێنانی ئەنجامی جۆری و سەركەوتنی گەورە.
ئاماژەی بۆ ئەوەشكرد: تەوەرێكی تر بریتی بوو لە چاودێریكردنی سەرپێچییەكانی هەڵبژاردن، بەو پێیەی دەزگا هەواڵگرییەكان توانیان هەوڵەكانی دڕاندنی وێنەی بانگەشە و فرۆشتنی كارتی دەنگدان پووچەڵبكەنەوە، جگە لە ڕووبەڕووبوونەوەی گوتاری رقوكینە و تائیفی و هەموو ئەوانەی كە زیان بە ئاشتی كۆمەڵایەتی دەگەیەنن، لەم بوارەدا ئەنجامی ئەرێنی كاریگەریان بەدەستهێناوە.
ئاشكراشیكرد: لە نێو تەوەرە گرنگەكانیشدا لیژنەی سیبرانیە كە تایبەتە بە بەدواداچوونی لایەنە تەكنیكییەكان و پاراستنی سیستەمە ئەلیكترۆنییەكانی كۆمسیۆنی باڵای هەڵبژاردنەكان، ئەوە جگە لە ڕووبەڕووبوونەوەی ئەو ماڵپەڕانەی كە هەوڵی ناوزڕاندنی عێراق یان بڵاوكردنەوەی پڕوپاگەندەی چەواشەكارانە یان ئامانجگرتنی پرۆسەی هەڵبژاردن دەدەن.
سەبارەت بە پلانی دوای داخستنی سندوقەكانی دەنگدانش، ڕوونیكردەوە: هەموو ناوەندەكانی دەنگدان بەبێ هیچ جیاوازییەك، دەكەونە ژێر ڕێكارەكانی ژماردن و جیاكردنەوەی دەستی و بەراوردكردنی ئەنجامەكان لەگەڵ ئامێرە ئەلیكترۆنییەكانی كۆمسیۆن، و لەم قۆناغەدا هێزە ئەمنییەكان پاراستنی ناوەندەكان و نووسینگەكانی كۆمسیۆن و كۆگاكان و ناوەندەكانی تۆماركردن بەهێز دەكەن.
وتیشی: پلانیش گواستنەوەی كەرەستەی هەڵبژاردن و فلاش میمۆرییە بۆ ناوەندە تایبەتەكان لە پارێزگاكان، و پاشان بۆ سەنتەری نیشتمانی لە بەغدا، بە سەرپەرشتی كارمەندانی باوەڕپێكراو و پاسەوانی ئەمنی توند، لەكاتێكدا فڕۆكەكانی هێزی ئاسمانی بۆ گواستنەوەی فلاش میمۆری لە پارێزگا دوورەكان و فڕۆكە هێلیكۆپتەرەكانی سوپا بۆ گواستنەوەیان لە قەزا و ناحیەكانەوە بۆ ناوەندەكانی شارەكان بەكاردەهێنرێن.
جەختیشیكردەوە: هێزە ئەمنییەكان یەدەگی ناوەندی و خۆجێیی و پلانێكی وردیان بۆ مانۆڕكردن بەپێی كاتە دیاریكراوەكان ئامادەكردووە، بۆ دڵنیابوون لە تەواوبوونی پرۆسەی گواستنەوە بە سەلامەتی و وردبینییەكی زۆر تا گەیشتنی سەرجەم كەرەستەكان بە سەنتەری نیشتمانی لە بەغدا.