ئەمریکا و مالیزیا ڕێککەوتنێکی بازرگانی واژۆ دەکەن ‏

22:16 2025-10-26 35285 عەرەبی و نێودەوڵەتی 0

2025-10-26

35285

‏"دۆناڵد ترامپ" سەرۆکی ئەمریکا و "ئەنوەر ئیبراهیم" سەرۆک وەزیرانی مالیزیا،ڕێککەوتنێکی بازرگانییان واژۆ کرد کە دەستڕاگەیشتنی ئەمریکا بە کانزا دەگمەنەکان زیاتر دەکات.
‏ئەمڕۆ یەکشەممە ،بەپێی هەواڵێکی ئاژانسی "فرانس پرێس" پەکین سنووردارکردنی بەرفراوانی لەسەر کەرتی کانزا دەگمەنەکان ڕاگەیاند، ئەمەش وای لە ترامپ کرد هەڕەشەی سەپاندنی گومرگی 100% لەسەر هاوردەکانی چین بکات وەک وەڵامێک بۆ ئەو هەنگاوە.
‏ترامپ لە چوارچێوەی لوتکەی کۆمەڵەی وڵاتانی باشووری ڕۆژهەڵاتی ئاسیا (ئاسیان) سەردانی کوالالومپور دەکات، پێش کۆبوونەوەیەکی چاوەڕوانکراو، ڕۆژی پێنجشەممە، لەگەڵ "شی جین پینگ" سەرۆکی چین.
‏بەپێی ڕێککەوتنە نوێیەکەی ئەمریکا و مالیزیا،کوالالومپور "پابەند دەبێت بە خۆبەدوورگرتن لە قەدەغەکردن یان سەپاندنی بڕیار لەسەر هەناردەکردنی کانزا گرنگەکان بۆ ئەمریکا،لەکاتێکدا واشنتۆن ڕازی بوو بە سەپاندنی گومرگی 19% لەسەر کاڵا مالیزیاکان.
‏مالیزیا هەروەها بەڵێنی دا کە پەرەپێدانی کەرتی کانزا دەگمەنەکان خێراتر بکات بە هاوکاری لەگەڵ کۆمپانیا ئەمریکییەکان، لەوانەش درێژکردنەوەی مۆڵەتەکانی کارکردن بۆ بەهێزکردنی تواناکانی بەرهەمهێنان.
‏هاوکات "جەیمیسن گریر" نوێنەری بازرگانی ئەمریکا، ڕایگەیاند کە ڕێککەوتنەکە وەبەرهێنان و بازرگانی لە کانزا دەگمەنەکاندا "تا بکرێت ئازاد و تا بکرێت نەرم دەکات، ئاماژەی بەوەشدا کە ئێمە لە جیهانێکدا دەژین کە خاوەندارێتی ئەم کانزا گرنگانە بۆ پیشەسازی و تەکنەلۆجیا و ئابووریمان گرنگە.
‏وتیشی: زۆر گرنگە کە وەک دوو هاوبەشی ئارەزوومەند هاوکاری یەکتر بکەین بۆ دڵنیابوون لەوەی کە زنجیرەی دابینکردنی بێ کێشەمان هەبێت.