مانگی داهاتو په‌رله‌مانى کوردستان ده‌ست به‌كاره‌كانی دەکات ‏

20:56 2025-08-14 58876 كوردستان 0

2025-08-14

58876

ئەمڕۆ پێنجشەممە، شاندی هاوبه‌شی دانوستانكاری پارتی دیموكراتی كوردستان و یه‌كێتیی نیشتمانیی كوردستان، كۆبونه‌وه‌ و رایانگه‌یاند، "هه‌ردولا رێکەوتوون له‌سه‌ر ئه‌وه‌ی كه‌ پێویسته‌ هه‌وڵی چڕ و جددی بدرێت بۆئه‌وه‌ی لە مانگی 9ی ئه‌مساڵ خولی شه‌شه‌می په‌رله‌مانی كوردستان ده‌ست به‌ كار و چالاكیی ئاسایی و یاساییی خۆی بكات ".
‏
‏لە راگه‌یه‌ندراوێكی هاوبەشی یەکێتی وپارتیدا هاتوو، ئه‌مڕۆ پێنجشه‌ممه‌ له‌ مه‌كته‌بی سیاسی یه‌كێتی له‌هه‌ولێر، هه‌ردو شاندی دانوستانكاری یه‌كێتیی نیشتمانیی كوردستان و پارتی دیموكراتی كوردستان به‌رده‌وامییان به‌كۆبونه‌وه‌كانیاندا.
‏
‏هه‌ردولا له‌كۆبونه‌وه‌كه‌دا جه‌ختیان كرده‌وه‌ كه‌ له‌ژێر رۆشنایی ئه‌و بنه‌ما و پرنسیپانه‌ی له‌ دیدگای هاوبه‌شی نێوان هه‌ردولادا ڕێككه‌وتنیان له‌سه‌ر كراوه‌ و ئه‌و هه‌نگاوانه‌ی نراون له‌پێناو ڕێكخستنی كاری هاوبه‌ش بۆ قۆناغی داهاتوی حوكمڕانیی كوردستان، به‌ره‌وپێشچونی گه‌وره‌ی به‌خۆیه‌وه‌ بینیوه‌، هه‌روه‌ها باس له‌ هه‌نگاوه‌ كرده‌ییه‌كان بۆ جێبه‌جێكردنی ئه‌و به‌رنامه‌یه‌ كرا.
‏
‏له‌ڕاگه‌یه‌ندراوه‌كه‌دا هاتوه‌، به‌ له‌به‌رچاوگرتنی بارودۆخی ئێستای ناوچه‌كه‌ و ئه‌و پێشهاتانه‌ی له‌ ئارادان، بۆ رێزگرتن له‌ ویست و ئیراده‌ی خه‌ڵكی كوردستان و ئه‌و به‌ڵێنانه‌ی هه‌ردولا به‌ جه‌ماوه‌ری خۆیان دابو و ده‌رئه‌نجامی هه‌ڵبژاردنی خولی شه‌شه‌می په‌رله‌مانی كوردستان و پارێزگاری له‌ پێگه‌ی یاسایی و سیاسیی هه‌رێمی كوردستان؛ هه‌ردولا هاوڕا بون له‌سه‌ر ئه‌وه‌ی كه‌ پێویسته‌ هه‌وڵی چڕ و جددی بدرێت بۆ ئه‌وه‌ی لە ئەیلولی ئه‌مساڵ خولی شه‌شه‌می په‌رله‌مانی كوردستان ده‌ست به‌ كار و چالاكیی ئاسایی و یاساییی خۆی بكات و هه‌نگاوه‌كانی دیكه‌ی پێكهێنانی كابینه‌ی نوێ به‌رده‌وام بن.