عێراق ... مووچەی چاودێری کۆمەڵایەتی تا کۆتایی ئەمساڵ دەستەبەرکراوە ‏

01:41 2025-07-05 87783 عێراق 0

2025-07-05

87783

سەرۆکی دەستەی پاراستنی کۆمەڵایەتی عێراق رایگەیاند، مووچەى چاودێرى کۆمەڵایەتى تا کۆتایی ئەمساڵ دەستەبەرکراوە ،وتیشی" ١٥٠ هەزار خوێندکار بەهۆی ئەو یارمەتیی هاندانەوە گەڕاونەتەوە قوتابخانە".
‏
‏ئەمڕۆ هەینی ، ئەحمەد خەلەف موسەوی، سەرۆکی دەستەی پاراستنی کۆمەڵایەتی عێراق وتی، مووچەى چاودێرى کۆمەڵایەتى تا کۆتایی ئەمساڵ دەستەبەرکراوە و زیاتر لە سێ ملیۆن و ٧٠٠ هەزار منداڵ چاودێرى کۆمەڵایەتى دەیانگرێتەوە.
‏
‏ئاماژەی بەوەشکرد، ژمارەی ئەو ژنانەی کە چاودێری کۆمەڵایەتی دەیگرێتەوە گەیشتووەتە نزیکەی ٦٠٠ هەزار کەس و مووچە و یارمەتییەکانی دەسەڵات تا کۆتایی ئەمساڵ بە تەواوی دەستەبەرکراوە، ئەو پارانەی لە چوارچێوەی بودجەی سێ ساڵەدا تەرخانکراون، دەگاتە ٦.٢ ترلیۆن دینار، بەپێی پلان پارەکە خەرج دەکرێت.
‏
‏سەبارەت بە یارمەتییە پەروەردەییەکەش وتی، یارمەتی دووەم کە بڕی ٨٢ ملیار دینار بوو، خەرجکراوە بۆ ٢.٢ ملیۆن خوێندکاری نێر و مێ کە چاودێری کۆمەڵایەتی دەیانگرێتەوە، قوتابیانی قۆناغی سەرەتایی ٣٠ هەزار دیناریان وەرگرتووە، قوتابیانی قوتابخانەی ناوەندی و ئامادەییش هەریەکەیان ٥٠ هەزار دیناریان وەرگرتووە.
‏
‏باسی لەوەشکرد، ئەو یارمەتییە بەشداربووە لە گەڕانەوەی زیاتر لە ١٥٠ هەزار قوتابی بۆ قوتابخانە لەئەمساڵدا، لە ناویاندا ١٤ هەزار قوتابی کە لە سەرەتای ساڵی خوێندندا ئامادە نەبوون و بەهۆی ئەو پشتگیرییەی پێشکەشیان کراوە گەڕاونەتەوە بۆ قوتابخانە و جەختیشی کردەوە، هەر منداڵێک واز لە خوێندن بێنێت بە پێی یاسا دەرماڵەکەی دەبڕدرێت.