سودانی: بەشێوەیەک مامەڵەمان لەگەڵ رووداوەکان کردووە کە بەرژەوەندیی گەلەکەمان لە پێشینەی کارەکاندا بێت ‏

22:33 2025-06-24 69548 عێراق 0

2025-06-24

69548

سەرۆک وەزیرانی عێراق رایگەیاند، ئێمە بەشێوەیەک مامەڵەمان لەگەڵ رووداوەکان کردووە، کە بەرژەوەندیی گەلی عێراق لە پێشینەی کارەکاندا بێت، ئاماژەیبەوەشکرد "ئەمەش هەڵوێستی خوازراوی هەموو لایەکە".
‏
‏ئەمڕۆ سێشەممە ، نوسینگەی سەرۆکی ئەنجومەنی وەزیران لەراگەیەندراوێکدا بڵاویکردەوە، محەمەد شیاع سودانی، سەرۆکی ئەنجومەن، لە دانیشتنی ئاسایی ئەمڕۆی ئەنجومەنەکە لەبارەی ئاگربەستی نێوان ئیسرائیل و ئێران رایگەیاند، هیوادارن رێککەوتنی ئاگربەستەکە بەهێز و یەکگرتوو بێت.
‏
‏وتیشی، "ئێمە بە ئیدانەکردن و رەتکردنەوەی دەستدرێژیی ئیسرائیل بۆ سەر کۆماری ئیسلامیی ئێران و هەوڵی بە ئەنقەست بۆ تێکدانی ئاسایش و ئارامیی ناوچەکە، هەڵوێستی عێراقمان دووپاتکردەوە".
‏
‏ئاماژەی بەوەشکرد، "ئێمە بەشێوەیەک مامەڵەمان لەگەڵ رووداوەکان کردووە، کە بەرژەوەندیی گەلی عێراق لە پێشینەی کارەکاندا بێت، ئەمەش هەڵوێستی خوازراوی هەموو لایەکە".
‏
‏سەرۆک وەزیرانی عێراق وتیشی، "هێزە چەکدارەکانمان و بەرگرییە ئاسمانییەکانمان، بە خێرایی وەڵامی هێرشەکانیان دایەوە و فڕۆکە هێرشبەرەکانیان خستەخوارەوە".
‏
‏سودانی باسی لەوەشکرد، "فەرمانمانداوە لێکۆڵینەوەیەکی گشتگیر، بە سەرکردایەتیی دەزگاکانی هەواڵگری و تەکنیکی بکرێت بۆ دیاریکردنی سەرچاوەکانی هێرشی درۆنەکە و بۆ ئەم مەبەستەش، حکومەتەکەمان پلانێکی تۆکمەی داڕشتووە بۆ دەستەبەرکردنی سیستمی بەرگریی ئاسمانی، هەروەها کۆمەڵێک گرێبەست و پرۆژە لەئارادان، بۆ تەواوکردنی کارەکانی دروستکردنی سیستمی بەرگریی ئاسمانی".