سودان پچڕانی پەیوەندییە دیپلۆماسییەکانی لەگەڵ ئیمارات ڕادەگەیەنێت

22:17 2025-05-06 53164 عەرەبی و نێودەوڵەتی 0

2025-05-06

53164

ئەنجومەنی بەرگری و ئاسایشی سودان پچڕانی پەیوەندییە دیپلۆماسییەکانی لەگەڵ ئیمارات ڕاگەیاند و هۆكارەكەی بۆ پاڵپشتیی ئەبوزەبی لە هێزەکانی پشتیوانی خێرا گەڕاندەوە و بانگهێشتی کارمەندانی باڵیۆزخانەی سودانی لە ئەبوزەبی كرد.

ئەنجومەنی بەرگری و ئاسایشی سودان، ئەمڕۆ سێشەممە لە ڕاگەیەندراوێكدا بڵاویكردەوە، "زیاتر لە دو ساڵە هەمو جیهان بەدواداچون بۆ تاوانی دەستدرێژیکردنە سەر سەروەری سودان، یەکپارچەیی خاکی سودان و ئاسایشی هاوڵاتیانی دەكەن كە لە لایەن ئیماراتی عەرەبی و لە ڕێگەی بە وەکالەتی ناوخۆیی و میلیشیای تیرۆریستی و یاخیبوی هێزەکانی پشتیوانی خێرا و پشتیوانە سیاسییەکەیەوە ئەنجامی دەدات".
ئاماژەی بەوەشکرد، "کاتێک ئیمارات دڵنیا بو لە شکستی بریکارەكانی، کە لەلایەن هێزە چەکدارەکانمانەوە شکستیان پێ هێنرا، پشتیوانییەکانی زیاتر کرد و زیاتر لە تواناکانی خۆی تەرخانکرد بۆ دابینکردنی چەکی ستراتیژی پێشکەوتو بۆ یاخیبون".

بەگوێرەی ڕاگەیەندراوەكە، "یاخیبوان بەردەوام بون لە کردنە ئامانجی دامەزراوە گرنگەکان و دامەزراوە خزمەتگوزارییەکان لە وڵاتەکەدا، لەم دواییانەشدا کۆگاکانی نەوت و گاز، بەندەر و فڕۆکەخانەی پۆرت سودان، وێستگەکانی کارەبا و هۆتێلەکانی کردوەتە ئامانج، كە ژیان و ماڵی ملیۆنان هاوڵاتی مەدەنی دەخاتە مەترسییەوە، ئەوەش بابەتێکە کە هەڕەشە لە ئاسایشی ناوچەکە و نێودەوڵەتی دەکات، بەتایبەتی ئاسایشی دەریای سور".
ئەنجومەنی بەرگری و ئاسایشی سودان دوپاتی کردەوە کە "لە ئەنجامی ئەم دەستدرێژییە بەردەوامە، ئەنجومەنی ئاسایش و بەرگری بڕیاری داوە بە ناساندنی ئیمارات وەک دەوڵەتێکی شەڕانگێز، بڕینی پەیوەندیە دیپلۆماسیەكان لەگەڵیدا و کشانەوەی باڵیۆزخانە و کونسوڵخانەی گشتی سودان لە ئیمارات.

ئەوەشی خستەڕو، هاوتەریب لەگەڵ مادەی 51ـی جاڕنامەی نەتەوە یەکگرتوەکان کە مافی بەرگریکردن بە دەوڵەتان دەدات، "سودان مافی خۆیەتی بە هەمو شێوەیەک وەڵامی دەستدرێژی بداتەوە بۆ پاراستنی سەروەری وڵات و یەکپارچەیی خاکەکەی، هەروەها بۆ دەستەبەرکردنی پاراستنی هاوڵاتیانی مەدەنی و بەردەوامیی گەیاندنی هاوکارییە مرۆییەکان".