سەرۆک کۆمار و هاوتا ئێرانییەکەی باس لە پەرەپێدانی هاریکاری هاوبەش و چەسپاندنی سەقامگیری ناوچەکە دەکەن

18:49 2025-04-11 47779 عێراق 0

2025-04-11

47779

عەبدوللەتیف جەمال ڕەشید سەرۆک کۆمار ومەسعوود پزیشکیان هاوتا ئێرانییەکەی باس لە پەرەپێدانی هاریکاری هاوبەش و چەسپاندنی سەقامگیری ناوچەکە دەکەن.
نوسینگەی ڕاگەیاندنی سەرۆکایەتی کۆمار لەڕاگەیەندراوێکدا کەدەستی موتەڵع کەوتووە بڵاویکردەوە،" عەبدوللەتیف جەمال ڕەشید، لە پەیوەندییەکی تەلەفۆنیدا لەگەڵ مەسعوود پزیشکیان سەرۆک کۆماری ئیسلامی ئێران پەیوەندیی دووقۆڵیی نێوان هەر دوو وڵاتی دراوسێ و چۆنییەتی پەرەپێدانی هاریکاریی لە بوارە جیاجیاکانی بەرژەوەندی هاوبەش تاوتوێکرا بە شێوەیەک کە خزمەت بە بەرژەوەندیی هەر دوو گەل بکات و ئاسایش و سەقامگیری لە ناوچەکەدا بچەسپێنێت".
وتیشی"هەردوو سەرۆک بەبۆنەی جەژنی ڕەمەزان و نەورۆزەوە پیرۆزباییان لە یەکتر کرد و هیوای پێشکەوتن و خۆشگوزەرانی زیاتریان بۆ گەلانی عێراق و ئێران خواست".
بەگوێرەی ڕاگەیەندراوەکە"لە میانی پەیوەندییە تەلەفونییەکەدا، هەردوولا چەندین بابەتی ناوچەیی و نێودەوڵەتییان تاوتوێ کرد و جەختیانکردەوە لە گرنگی بەردەوامی هاریکاری نێوان هەردوو وڵات و چڕکردنەوەی هەوڵەکان و گفتوگۆی بنیاتنەر بۆ چارەسەرکردنی ئاستەنگەکان و چەسپاندنی بناغەکانی گەشەپێدان و سەقامگیری".
لەکۆتایی ڕاگەیەندراوەکە هاتووە"هەروەها ڕێککەوتن کرا لەسەر چالاککردنی هەماهەنگی لە مامەڵەکردن لەگەڵ پێشهاتە ناوچەیی و نێودەوڵەتییەکان، بە شێوەیەک کە بەشداربێت لە پشتیوانیکردنی سەقامگیری سیاسی و کەمکردنەوەی گرژییەکانی ناوچەکە".