فایق زەیدان: سەربەخۆیی دەسەڵاتی دادوەری عێراق ئەمڕۆ پایەیەکی بنەڕەتییە لە گەیشتن بە دادپەروەری و یەکسانی

10:51 2025-01-23 113623 عێراق 0

2025-01-23

113623

ئەمڕۆ پێنجشەممە، سەرۆکی ئەنجوومەنی باڵای دادوەری، دادوەر فایق زیدان، دووپاتی کردەوە، سەربەخۆیی ئەمڕۆی دەسەڵاتی دادوەری عێراق پایەیەکی بنەڕەتییە لە بەدیهێنانی دادپەروەری و یەکسانی لەنێوان هەموو هاووڵاتیان بەبێ جیاوازی، هاوکات ئاماژەی بە پەرەپێدانی سیستەمی دادپەروەری تاوان و مەدەنی بەگوێرەی ستانداردە نێودەوڵەتییەکان.

سەرۆکی ئەنجوومەنی باڵای دادوەری، دادوەر فایق زیدان لە وتارێکدا لە میانی ئاهەنگگێڕان بەبۆنەی ڕۆژی دادوەری عێراق ڕایگەیاند: سەربەخۆیی دەسەڵاتی دادوەری بناغەی بنیاتنانی هەر سیستەمێکی دیموکراسییە، سەربەخۆیی دەسەڵاتی دادوەریش پایەیەکی بنەڕەتییە لەگەیشتن بە دادپەروەری و یەکسانی لەنێوان هەموو هاوڵاتیان بەبێ جیاوازی” ئاماژەی بەوەشکرد، "کارمان کردووە بۆ پتەوکردنی سەربەخۆیی دەسەڵاتی دادوەری و دابینکردنی کەشێکی گونجاو بۆ دادوەرەکان بۆ ئەوەی بە ئازادی و بێلایەنانە کاربکەن، دوور لە هەر کاریگەرییەک، دەسەڵاتی دادوەری شایەتحاڵی گۆڕانکاری گرنگ بووە، بگرە لە دروستکردنی دادگا، بەرەو پەرەپێدانی یاسا تاوەکو گەیشتن بە پتەوکردنی سەربەخۆیی دەسەڵاتی دادوەری”.
ئاماژەی بەوەشکرد، "هەوڵەکانمان داوە بۆ مۆدێرنکردنی ڕێکارەکان، پەرەپێدانی بینای دادگاکان، و ڕاهێنانی دادوەرەکان بۆ پێشکەشکردنی خزمەتگوزاری دادوەری کوالیتی بەرز. سیستەمی دادوەری تاوانکاری و مەدەنی بەگوێرەی ستانداردە نێودەوڵەتییەکان پەرەی پێدراوە"، ئەمەش ئاماژەیە بۆ ئەوەی "دەسەڵاتی دادوەری سەلماندوویەتی". توانای ڕووبەڕووبوونەوەی ئەو ئاڵنگاریی و سەختییە گەورانەی هەیە کە شیرازەی دەوڵەتی عێراقیان خستە مەترسییەوە، وئەو خاڵە گەشاوەیە کە یارمەتیدەر بوو لە هاوسەنگی و بنیاتنانەوەی متمانە لە نێوان گەل و دەوڵەتدا”.
زیدان ڕوونیشیکردەوە، “بەرپرسیارێتی ئێمە وەک دادوەر زۆرە، چونکە بەرپرسیارێتی گەورەی پاراستنی دادپەروەری و پاراستنی ماف و ئازادییەکانی تاکەکان لە ئەستۆ دەگرین”، سوپاس و پێزانینی ئاراستەی “هەموو دادوەران و کارمەندانی دەسەڵاتی دادوەری کرد بۆ دڵسۆزیی کارکردن و دەستپاکی، و پێداگریان لەسەر گەیشتن بە دادپەروەری".