پوتن: ڕێككەوتننامەی ستراتیجی نێوان تاران و مۆسكۆ ڕۆڵی گەورەی بواری بازرگانی و ئابوریدا دەبێت

23:04 2025-01-17 95044 عەرەبی و نێودەوڵەتی 0

2025-01-17

95044

ڤلادیمێر پوتن، سەرۆكی ڕوسیا رایگەیاند، ڕێككەوتننامەی ستراتیجی نێوان تاران و مۆسكۆ ڕۆڵی گەورەی بواری بازرگانی و ئابوریدا دەبێت و لە پڕۆژەی هاوبەشی گرنگ و گەورەدا هاوکاری یەكدی دەکەن، لەوانە پەرەپێدانی وێستگەی کارەبای ئەتۆمی و پڕۆژەکانی وزە، هاوکاری لە بواری گەشتیاری، کەرتی گواستنەوە، کولتوری و هەماهەنگیی زیاتر لە پرسە ناوچەی و نێودەوڵەتیەكاندا دەكەن.

ڤلادیمێر پوتن، لەمیانەی كۆنگرەیەكی ڕۆژنامەوانی لەگەڵ هاوتا ئێرانیەكەی لە كۆشكی سەرۆكایەتی ڕوسیا (كرێملێن) لە مۆسكۆ ڕایگەیاند، سەردانەکەی مەسعود پزیشكیان سەرۆك كۆماری ئێران بۆ ڕوسیا بە تایبەتی گرنگە، چونکە نەک هەر پێداچونەوە بە هەمو بابەتەکانی پەیوەست بە هاریکاریی دوقۆڵی دەکەن، بەڵکو ڕێککەوتنی هاوکاری ستراتیژی نێوان هەردو وڵات واژۆ دەکەن.
ئاماژەی بەوەشكرد، ئەو پەیماننامەیە ستراتیژییە ڕۆڵی لە پەرەپێدانی هاوکارییەکانی نێوان هەردو وڵات، بەتایبەتی لە بواری بازرگانی و ئابوریدا دەبێت، هەروەها پرۆسەی پەرەپێدانی پەیوەندییەکانی نێوان هەردو وڵات بەشێوەیەكی خێرا لە گەشەكردندایە، توانیویانە قەبارەی بازرگانی نێوان هەردو وڵات بە ڕێژەی 15% زیاد بکەن و دڵنیان کە ئەو پەیماننامەیە یارمەتیدەر دەبێت بۆ خێراکردنی پەرەپێدانی پەیوەندییەکان لە هەمو لایەنەكانەوە.
ڤلادیمێر پوتن باسی لەوەشكرد، "لەسەر بنەمای ئەو ڕێککەوتنە لە پڕۆژەی هاوبەشی گرنگ و گەورەدا هاوکاری یەكدی دەکەین، لەوانە پەرەپێدانی وێستگەی کارەبای ئەتۆمی و پڕۆژەکانی وزە، هاوکاری لە بواری گەشتیاریدا بە ڕێژەی 21% زیاد دەکات، هاوکاری لە کەرتی گواستنەوە و پەرەپێدانی ڕێگاکانی گواستنەوەش دەكەین" .
سەرۆکی ڕوسیا جەختی لە پەرەپێدانی هاریکاری کولتوری و هەماهەنگیی زیاتری ناوچەی و نێودەوڵەتی لەسەر بنەمای ئەو پەیماننامە ستراتیژییەی نێوان هەردو وڵات کردەوە و وتی، "خۆشحاڵین بە ئامادەبونی پزیشكیان لە ڕوسیا و هیوای باشترین بۆ ڕێبەری باڵای ئێران دەخوازین، كە ئەم پرسە دو قۆڵیانەی نێوان ڕوسیا و ئێران لە ژێر چاودێری و کۆنترۆڵی ئەواندا ئەنجام دەدرێت".