سەرۆکی گرووپە چەکدارەکانی تەحریر شام داوا دەکات حەشدی شەعبی عێراق ڕووبەڕوویان نەبێتەوە

18:38 2024-12-05 34753 عێراق 0

2024-12-05

34753

ئەبو مەحەممەد جۆلانی، سەرۆكی دەستەی تەحریری شامی سووری توندڕەو پەیامێک ئاڕاستەی سەرۆکوەزیرانی عێراق دەكات و داوای لێدەكات رێگری بكات لەوەی حەشدی شەعبی دەستوەردان لە دۆخی سوریادا بكات.
جۆلانی، سەرۆكی چەکدارانی تەحریر شام-ی ئۆپزسیۆنی سووریا لە پەیامێكی ڤیدیۆییدا باس لەوەدەكات كە، هەندێک لە سەركردە سیاسییەكانی عێراق نیگەرانیان بۆ دروست بووە لەبارەی ئەوەی كە ڕووداوانەی لە سووریا روودەدات بگوازرێتەوە بۆ عێراق، "ئەو شتە هەڵەیە".
سەرۆكی دەستەی تەحریری شام هێرشی گروپەكەی و گروپە چەكدارەكانی دیكە لە سووریا بۆ شارەکانی حەماە و کۆنترۆلکردنی شاری حەلەب و ئیدلب لە باکووری سووریا بە "شۆڕشی گەل" ناودەبات لە دژی ستەمی رژێمی بەشار ئەسەد، هەروەک خۆی باس لێکرد و دەشڵێت: شۆڕش لە سووریا هیچ پەیوەندییەكی بە دۆخی ناوخۆی عێراقەوە نییە.
ئەبو مەحەممەد جۆلانی دەشڵێت: تكامان لە سەركردە عێراقییەكان لەسەرو هەمویشیانە مەحەممەد شەیاع سودانی، سەرۆکوەزیران ئەوەیە كە نەهێڵێت عێراق و لایەنەکانی ناو عێراق دەستێوەردان لەو دۆخەی ناو سووریا بکەن و رێگری بكات لە ناردنی حەشدی شەعبی بۆ سووریا.

ئەم پەیامە لەکاتێکدا، دوێنی چوارشەممە 4ـی کانوونی یەکەم، سەرۆکی ڕێکخراوەی حەشدی شەعبی عێراقی ئامادەیی تەواوی چەکدارانی حەشدی شەعبی و هێزە ئەمنییەکانی عێراقی بۆ مامەڵەکردن لەگەڵ گرووپە "تیرۆریستيەکان" ڕاگەیاند.
لە لێدوانێکی بۆ ئاژانسی هەواڵی عێراقی، فالح فەیاز، سەرۆکی ڕێکخراوەی حەشدی شەعبی عێراق ڕایگەیاند: حەشدی شەعبی و هێزە ئەمنییەکانی عێراق ئامادەن بۆ ڕووبەڕووبوونەوەی تیرۆریستان.
ناوبراو لە درێژەی قسەکانیدا لە پارێزگای نەینەوا لە باکووری ڕۆژئاوای عێراق، گوتیشی: فەرماندەی گشتی هێزە چەکدارەکان هەموو ئاسانکارییەکی بۆ پاڵپشتیکردنی هێزە ئەمنییەکان دابینکردووە کە ئاسایشی وڵات دەپارێزن، بە گەلی عێراق ڕادەگەیەنین کە عێراق بە سەقامگیری دەمێنێتەوە و دەزانین چۆن شەڕی تیرۆریستان بکەین.
ئەوەش دوای ئەو مەترسیانەی لە ناوخۆی عێراق دەرکەوت، دوای ئەوەی گرووپە چەکدارە توندڕەوکانی ئۆپۆزسیۆنی سووریا سەربە تورکیا، هێرشیان کردەسەر شارەکانی حەلەب و حەماە و ئیدلب لە سووریا، ئەمەش مەترسی بۆ ناوخۆی عێراق درووستکرد لە مەترسیی نزیکبوونەوەی ئەو گرووپە توندڕەوانە لە سنووری عێراق.