دەزگای ئاسایشی هەرێم ئەنجامی وردەکاریی لێکۆڵینەوەی تیرۆرکردنی "نیاز دەرگەڵەیی" بە بەڵگە ڤیدیۆیەک بڵاودەکاتەوە.
لە ڕاگەیەندراوەکەی دەزگای ئاسایشی هەرێم کە ئەمڕۆ دووشەممە بڵاوکرایەوە، هاتووو، دوای ئەوەی لەشەوی 18ـی 8ـی 2023 شەهید نیاز دەرگەڵەیی سەردانی باخەکەی دەکات لە باشووری قەزای ڕانیە لە (کانی قوڵکە)ی سەر بە شارەدێی (بۆسکێن) کە دەکەوێتە نزیک دەریاچەکە، لەلایەن سێ تۆمەتبار چاودێری وورد دەکرێت و لەکردەیەکی بەرنامە بۆ داڕێژراو کاتژمێر 8:40ـی شەو نیاز دەرگەڵەیی لەناو باخەکەی خۆی بە چەکی جۆری دەمانچەی بێدەنگ (کاتم سەوت) تیرۆر دەکرێت.
ئەوەش خراوەتەڕوو، تۆمەتباران هەمان ڕۆژ 18ـی 8ـی 2023 کاتژمێر 4:26ـی پاشنیوەڕۆ لە ڕێگای گوندی (بێستانە)ـی سنووری پارێزگای هەولێر بەڕێگەی دێگەڵەدا، بە ئۆتۆمبێلی جۆری (تویتا هایلۆکس ڕەنگ سپی) هەڵگری تابلۆی ژمارە 227778 عێراق_هەولێر (جام ڕەش)، بەڵام لە بنەڕەتدا ژمارەی ئۆتۆمبێلێکی دیکەیە و بەنایاسایی بۆ ئەم تاوانە بەکارهێنراوە کە خاوەندارێتی دەگەڕێتەوە بۆ (فەرهاد خانۆ خانۆ عەلی شێروانی) لە ڕێگای تەقتەق-کۆیە بە چیای هەیبەت سوڵتان بەرەو ڕێگای هیزۆپ و پاشان لەشارۆچکەی چوارقوڕنەوە بە ئاڕاستەی شوێنی ڕووداوەکە دەڕۆن، تۆمەتباران بە سوود وەرگرتن لە ڕێگا لاوەکییەکان دەچنە شوێنی ڕووداو.
تۆمەتباران کاتژمێر 6:32ـی ئێوارە لەنزیکەوە بە وردی چاودێری باخەکە دەکەن، لە وردەکاریی لێکۆڵینەوە و گرتەکانی کامێرای چاودێری دەردەکەوێت سێ تۆمەتبار لە هەولێرەوە لەسنووری گوندی بێستانەوە خۆیان دەگەیێننە شوێنی ڕووداوەکە و پاش دڵنیابوونەوە لەوەی نیاز دەرگەڵەیی بەتەنیایە (دوو) لە تۆمەتباران بەپیادە لەبەشی پشتەوە (تەلی سیاجی) باخەکە دەبڕن و یەکێک لە تۆمەتباران دەچێتە ژوورەوە و ئەوەی دیکەیان لە دەرەوەی باخەکە چاودێری دەکات، هەروەها بەپێی لێکۆڵینەوەکانی تیمی بەڵگەی تاوان تەنها شوێن پێی یەک تۆمەتبار پاش ئەنجامدانی تاوانەکە لەکاتی هەڵگرتنەوەی شوێن پێیان بەدیواری باخەکەدا دەمێنێتەوە و بەچەکی جۆری دەمانچەی بێدەنگ، لەگەڵ بینینی (نیاز دەرگەڵەیی) لەناو ماڵەکەی 5 فیشەک دەتەقێنێت و 3 فیشەک بەر سەری (نیاز دەرگەڵەیی) دەکەوێت و دەبێتە هۆی شەهیدبوونی و دوای ئەنجامدانی تاوانەکە تۆمەتباران بەپیادە بە ئاڕاستەی شوێنی وەستانی ئۆتۆمبێلەکەیان هەڵدێن کاتژمێر 8:45ـی شەو بەخێراییەکی زۆر شوێنی ڕووداوەکە جێدەهێڵن و بەنزیکەی 800 مەتر ئۆتۆمبێلەکەیان لەباخەکەوە دوورە و بەهەمان وردەکاریی ڕێگە لاوەکییەکانی هاتنیان هیزۆپ-هەیبەت سوڵتان -کۆیە خۆیان دەگەیەننە گوندی بێستانەی سنوری پارێزگای هەولێر و دەگەڕێنەوە.
دەزگای ئاسایشی هەرێم ئەوەشی خستۆتەڕوو، بەهۆی بەردەوامی بەدواداچوونەکانی دەزگای ئاسایش هەرێم و پاراستنی ڕەوتی لێکۆڵینەوە لەسەر بڕیاری دادوەری لێکۆڵینەوەی ڕانیە فەرمانی دەستگیرکردن بۆ(فەرهاد خانۆ خانۆ عەلی شێروانی) بە ماددەی 406 لەیاسای سزادانی عێراقی دەرچووە و وردەکاری بەڵگەڤیدیۆی تاوانەکە لەئێستادا لەلایەن دەزگای ئاسایشی هەرێم بڵاودەکرێتەوە و بەدواداچوون و کۆکردنەوەی زانیاری و لێکۆڵینەوەکان لەسەر ئەم کەیسە بەردەوامە.

کورتەیەک دەربارەی نیاز دەرگەڵەیی ...
نیاز جەلال بەگ مەحەممەدەمین یەحیا ناسراو‌ بە (نیاز دەرگەڵەیی)، لە ساڵی 1956/7/1 لە قەزای ر‌ەواندزی سەر بە پارێزگای هەولێر لەدایكبووە، ئامادەیی كشتوكاڵی تەواوكردووە و ساڵی 1977 پەیوەندی بە شۆڕ‌شی نوێ و ساڵی 1981 پەیوەندی بە هێزی پێشمەرگەی یەکێتیی كردووە لە هەرێمی حەوتی باڵەک، دواتر لە تیپی 78ـی كارۆخ درێژەی بە پێشمەرگایەتی داوە.
نیاز دەرگەڵەیی ئەو ساڵانەی پێشمەرگە بووە بەشداری لە چەندین هێرش و بەرگریی كردووە لە سنووری مەڵبەندی سێی یەکێتیی هەولێر، لە ژیانی پێشمەرگایەتیدا پێنج جار برینداربووە، كە سێ جار بە فیشەک و دووجاریش بە چەكی كیمیایی و دواپلەی پێشمەرگایەتی لەپێش راپەڕین فەرماندەی كەرت بووە، لە ر‌اپەڕیندا بەشداری كردووە و ر‌ۆڵی كارای بینیوە لە رزگاركردنی شار و شارۆچكەكاندا، لە تەشكیلاتی دوای ر‌اپەڕینیش لە چەندین ئۆرگان درێژەی بە پێشمەرگایەتی داوە، فەرماندەی فەوج بووە لە سوپای یەكگرتوو، فەرماندەی بەتالیۆن، جێگری هێز و لێپرسراوی میحوەری وەرتێ بووە، لە ‌حكومەتی هەرێمی كوردستانیشدا كراوەتە قائیمقامی هەردوو قەزای چۆمان و دوكان.
نیاز دەرگەڵەیی ئەندامی پێشووی ئەنجومەنی ناوەندیی یەكێتیی نیشتمانیی كوردستان، شەوی 2023/8/18 لە سنووری رانیە تیرۆرکرا.