گروپێکی چەکداری داوایکرد دەستبەجێ هێزەکانی تورکیا خاکی هەرێمی کوردستان و عێراق بەجێبهێڵن

09:44 2024-06-26 141699 كوردستان 0

2024-06-26

141699

گرووپی چەکداری "فەیلەق ئەلوەعد ئەلسادیقون" کە سەر بە مقاوەمی ئیسلامی عێراقە لە بەیاننامەیەکدا داوایکرد دەستبەجێ هێزەکانی تورکیا خاکی هەرێمی کوردستان و عێراق بەجێبهێڵن.
لە بەیاننامەی ئەو گرووپە چەکداریە کە تێیدا هەڕەشەی لە سوپا و هێزەکانی تورکیا کرد هاتووە، "هێزکانی تورکیا دەستدرێژی و داگیرکارییکی دڕندانی نوێیان بۆ گوندەکان ئەنجامداوەو بوونەتە هۆکاری تۆقاندنی هاوڵاتیانی عێراقی بەبێ ئەوەی پێشتر هەماهەنگی لەگەڵ حکومەتی ناوەندی و بەبێ ئاگاداری هاتونەتە خاکی عێراق و لە بێدەنگی حکومەت سەرسامین".
لە بەیاننامەکەی ئەو گرووپە چەکداریەی سەر بە مقاوەمی ئیسلامی عێراق هاتووە، "هەرێمی كوردستان لەبێ دەنگی و هەڵوێستی پشتیوانی کرد لەم داگیرکەرانەدا و مقاوەمی عێراق ئامادەیی خۆی دەردەبڕێت بۆ دەرکردنی داگیرکەران لەخاکی عێراق هەروەک چۆن لەگەڵ ڕێکخراوەی تیرۆریستیی داعشی کرد، هەر کەسێک بێت و لەکوێ بێت".
فەیلەقی وەعدی سادیقون لەکۆتاییی بەیاننامەکەی ئاماژەی بەدەوا، داوا دەکەین پەرلەمانی عێراق لە دانیشتنێکی نائاسایی و بەپەلەدا هەڵوێستی خۆی لەسەر ئەو هێرشانەو دەستدرێژیانە ڕابگەیەنێت و پێویستە هێزە داگیرکەرەکانی تورکیا دەستبەجێ لە خاکی عێراق بکشێنەوە بۆ پاراستنی خوێن و شکۆی هێزەکانی.
شایەنی باسە، شەوی دووشەممەی ڕابردوو، دەیان سەربازی سوپای تورکیا لە کانی ماسی و گوندی کێستە لەسنووری قەزای ئامێدی لە پارێزگای دهۆک بینران، ئەو سەربازانە لەکوچەو کۆڵانەکانی کانی ماسی و کێستە لە دهۆک بینراون بە چەندین چەکی جۆراوجۆر بەبێ ئەوەی هۆکاری گەڕانیان بزاندرێت.
لەکاتێکدا چەندین ساڵە سوپای تورکیا لە خاکی هەرێمی کوردستان بوونی هەیە و زیاتر لە چل بارەگای سەربازی بۆخۆی و هێزەکانی لە پارێزگای دهۆک و ڕۆژهەڵاتی هەولێر دروستکردووە بە بیانوی بوونی پارتی کرێکارانی کوردستان، لەکاتێکدا هێرشە فڕۆکەوانیەکانی تورکیا بوونە هۆی کوژرانی زیاتر لە 130 هاوڵاتی سڤیلی هەرێمی کوردستان لەماوەی هەشت ساڵی ڕابردوودا و لەسەرتای ئەمساڵ بەگوێرەی ڕێکخراوەی CPT، دە هاوڵاتی مەدەنی لە هەرێمی کوردستان بەهۆی هێرشەکانی تورکیا گیانیان لەدەستداوە کە ئەمانە تەنها ژمارەی ڕاگەیندراوەکانە، لەبەرامبەردا چەندین هاوڵاتی تری مەدەنی لە شەنگال کراونەتە ئامانج.