پۆلیسی ڕاپه‌ڕین تۆمه‌تبارێكی دەستگیرکرد كه‌ ماوه‌ی زیاتر له‌ شه‌ش ساڵه‌ خه‌ریكی فریودانی ئافره‌تانه‌

21:27 2025-04-06 52813 كوردستان 0

2025-04-06

52813

به‌ڕێوه‌به‌رایه‌تی پۆلیسی ئیداره‌ی ڕاپه‌ڕین رایگه‌یاند، تۆمه‌تبارێك كه‌ ماوه‌ی زیاتر له‌ شه‌ش ساڵه‌ خه‌ریكی فریودانی ئافره‌تانه‌ به‌ناوی ئه‌وه‌ی گوایه‌ دایانده‌مه‌زرێنێت، "داوای وێنه‌ و زانیاری و پاره‌ی لێكردون".

به‌ڕێوه‌به‌رایه‌تی پۆلیسی ڕاپه‌ڕین له‌ڕاگه‌یه‌ندراوێكدا بڵاویكرده‌وه‌، "هێزه‌كانمان له‌ نوسینگه‌ی نه‌هێشتنی تاوانی پشده‌ر (مكافحه‌) كه‌سێكیان ده‌ستگیركردن كه‌ له‌ ڕێگه‌ی په‌یجه‌كانه‌وه‌ ڕیكلامی بۆخۆی كردوه‌ گوایه‌ ئافره‌ت داده‌مه‌زرێنێت وه‌ك سكرتێری پزیشك و یاریده‌ده‌ری ده‌رمانساز به‌بێ ئه‌وه‌ی هیچ شاره‌زایه‌كی له‌ ته‌ندروستیدا هه‌بێت یاخود ڕاسپێردرابێت".
ئاماژه‌ی به‌وه‌شكردوه‌، "له‌ ڕیكلامه‌كاندا ژماره‌ مۆبایلی خۆی داناوه‌ و دواتر له‌ ڕێگه‌ی تۆڕه‌ كۆمه‌ڵایه‌تیه‌كان سه‌دان ئافره‌تی فریو داوه‌ و داوای وێنه‌ و زانیاری كه‌سی لێكردون".
ئه‌وه‌شیخستۆته‌ڕو، "دوای ده‌ستگیركردنی، تۆمه‌تباره‌كه‌ دانی به‌ تاوانه‌كه‌یدا ناوه‌ و به‌ وته‌ی خۆی له‌ ساڵی 2019 تا ئێستا خه‌ریكی ئه‌و كاره‌یه‌ و وێنه‌ی كه‌سانی دیكه‌ی بۆ ئافره‌تان ناردوه‌ و پێی وتون ئه‌وه‌ خۆیه‌تی بۆ ئه‌وه‌ی ئاشكرا نه‌بێت".
باسی له‌وه‌شكردوه‌، "دوای ده‌ستبه‌سه‌رداگرتنی مۆبایله‌كه‌ی، ده‌ركه‌وت سه‌دان وێنه‌ی ئافره‌تانی تێدایه‌، تۆمه‌تبار تۆڕه‌كانی سناپ و ڤایبه‌ر و واتسئاپی بۆ گفتوگۆكردن له‌گه‌ڵیاندا به‌كارهێناوه‌ و جگه‌ له‌وێنه‌ و زانیاری كه‌سی داوای پاره‌شی لێكردون".

پۆلیسی ئیداره‌ی راپه‌ڕین رونیشیكردۆته‌وه‌، "پاش ئه‌وه‌ی له‌به‌رده‌م پۆلیس و دادگا دانی به‌ تاوانه‌كه‌یدا ناوه‌، به‌ بڕیاری دادوه‌ر به‌ مادده‌ی 456 له‌ یاسایی سزادانی عیراقی ڕاگیركراوه‌ كه‌ دانیشتوی سنوری ئیداره‌ی ڕاپه‌ڕینه‌".