پارتی دیموکراتی کوردستان لە باشترین کاتی پەیوەندییەکانیە لەگەڵ کۆماری ئیسلامی ئێران

09:27 2024-06-21 93591 كوردستان 0

2024-06-21

93591

ئاری هەرسین، بەرپرسی لقی چواری پارتی دیموکراتی کوردستان سەبارەت بە پەیوەندییەکانی هەرێمی کوردستان لەگەڵ ئێران دەڵێت: ئێمە ئێستا وەک پارتی دیموکراتی کوردستان بە خۆشحاڵیەوە لە باشترین کاتی پەیوەندییەکانمانین لەگەڵ کۆماری ئیسلامی ئێران، ئینشائەلڵا هەرواش دەمێنێتەوە.
ئاری هەرسین، بەرپرسی لقی چواری پارتی دیموکراتی کوردستان لە سلێمانی لە بەرنامەی ڕۆژ لە کەناڵی VOH گوتوویەتی: ئێران پۆزشی نەهێناوەتەوە و ئێمەش سیاسەت بەدڵداری ناکەین، هۆکاری ئەوەی ئێران پۆزشی نەهێناوەتەوە ئەوەیە کورد دەوڵەت نیە، هۆکاری نەبوون بەدەوڵەتیشمان ئەوەیە کورد یەکگرتوو نیە، ئەم قسەیە دەکەم بۆم هەڵگرن، "16ی ئۆکتۆبەر ئێمە وەک پارتی و یەکێتیی درز لەنێوانمان نەبووایە باوکی حەشدی شەعبیش نەیدەتوانی کەرکووک بگرێت".
ئاری هەرەسین لەمیانەی بەرنامەکە وتی: خۆشبەختانە ئێران لەوە تێگەیشتووە هاوکاری و هەماهەنگی لەگەڵ هەرێم پێویستە بۆ ئێران لەڕووی ئابووری و ئەمنی و هەتا لە ڕووی فەرهەنگیەوە، بەپێچەوانەی ئەوەی کە هەرێمی کوردستان مەترسی بێت بۆ سەر ئاسایشی ئێران، بەپێجەوانەوە دەرچەیەک بێت بۆ پەیوەندییەکانی لەگەڵ وڵاتانی دەرەوە و عەرەبی و ئەوروپا و ئەمەریکا و هەموو وڵاتان".
بەرپرسی لقی چواری پارتی دەشڵێت: ئێران مافی خۆیەتی کە بە ئێمە دەڵێت نابێت بەشێک بن لەو موئامەرەیەی لەسەر ئەمنیەتی ئێران دەکرێت وەک بابەتی حزبەکانی کۆمەڵە و دیموکرات، حەقە ئێران ماف بە ئێمەش بدات پێییان بڵێین ئەو خەڵکانەی کە خۆیان بە دۆست و کوالیسیۆنێک دەزانن لەگەڵ ئێوەدا.
ئاری هەرسین وتیشی: ئێمە تەڵاقی سیاسیمان ناکەوێ ئەگەر لێرەوە هەستین بچین بۆ تاران دانوستان لەگەڵ ئێران بکەین، وە تەڵاقی سیاسیشمان ناکەوێ ئەگەر بچینە ئەنقەرە یاخود لە هەولێر پێشوازی لە ئەردۆغان بکەین، هەر لەو ئەمەریکایەی ئێوە دەتوانم دە نموونە بهێنمەوە کە ئەمەریکا دەستی خستۆتە ناو دەستی دوژمنەکەی لەپێناو بەرژەوەندی وڵاتەکەدا.