وەزیری پێشمەرگە: هاوکاری ئەمریکاو هاوپەیمانان بۆ هێزی پێشمەرگە بەردەوام دەبێت ‏

23:12 2025-09-01 47647 كوردستان 0

2025-09-01

47647

ئەمڕۆ دووشەممە، وەزیری پێشمەرگە رایگەیاند، دڵنیابوینەوە هاوكاری ئەمریكاو هاوپەیمانان بۆ هێزی پێشمەرگە بەردەوام دەبێت،وتیشی هەوڵەكانیان بۆ سەرخستنی پڕۆسەی چاكسازی لە وەزارەتەكەیان چڕتر كردونەتەوەو.
‏
‏ وەزارەتی پێشمەرگە لە راگەیەندراوێكدا وتی، ئەمڕۆ دوشەممە، شۆڕش ئیسماعیل، وەزیری پێشمەرگە پێشوازی لە کۆڵۆنێڵ دێک پایلویک، بەرپرسی نوسینگەی هاریکاری ئاسایش لە کونسوڵخانەی گشتیی ئەمریکا لە هەرێمی کوردستان و تیمێکی سەربازی یاوەری کرد.
‏
‏لەبەشێکی کۆبونەوەکەدا، بەپێی راگەیەندراوەكە، دەربارەی دوایین بەرەوپێشچونەکانی پرۆسەی چاکسازی و بنیاتنانی دو ناوچەی سەرکردایەتی سەربازی و فیرقەکانی پیادە لە وەزارەتی پێشمەرگە گفتوگۆکرا، وەزیری پێشمەرگە رایگەیاند: پرۆسەی چاکسازی بەردەوامەو هەوڵەکانمان بۆ سەرخستنی چاکسازی چڕترکردۆتەوە.
‏
‏لەبارەی هاوکارییەکانی ئەمریکا بۆ هێزی پێشمەرگەی کوردستان وەزیری پێشمەرگە و بەرپرسی نوسینگەی هاریکاری ئاسایش گفتوگۆیانکرد، وەزیری پێشمەرگە ستایشی پشتیوانی بەردەوامی ئەمریکا و هاوپەیمانانی کرد بۆ وەزارەتی پێشمەرگە راشیگەیاند: "هێزی پێشمەرگەی کوردستان لە قۆناغی گەشەسەندن و بەهێزبوندایە بۆ ئەمەش پێویستمان بە هاوکاری دۆستەکانمانە لە سەرو هەمویانەوە ئەمریکا، دڵنیابوینەوە ئەمریکاو هاوپەیمانان لە هاوکاری و پشتیوانی هێزی پێشمەرگەی کوردستان بەردەوام دەبن."
‏
‏بەگوێرەی راگەیەندراوەكە، کۆڵۆنێڵ دێک پایلویک رایگەیاند: بەردەوام هاوکاری وەزارەتی پێشمەرگە دەبین بۆ بنیتانانی ژێرخانێکی سەربازی نیشتمانی بەهێز و بە ئامانج گەیاندنی پرۆسەی چاکسازی.