وەزیری ناوخۆ ستایشی ڕۆڵی هۆزەکانی عێراق دەکات لە پاڵپشتیکردنی ئاسایش و سەقامگیری وڵات

20:22 2025-02-10 104711 عێراق 0

2025-02-10

104711

ئەمڕۆ دووشەممە، وەزیری ناوخۆ، عەبدولئەمیر ئەلشەمەری، داوای لە هۆزەکانی عێراق کرد ڕۆڵی خۆیان لە بەرەنگاربوونەوەی ماددە هۆشبەرەکان بەرز بکەنەوە و بەشداری بکەن لە بەرتەسککردنەوەی چەک بۆ دەوڵەت، هاوکات ستایشی ڕۆڵی هۆزەکانی عێراقی کرد لە پشتیوانیکردنی ئاسایش و سەقامگیری وڵات.
شەمەری لە میانی کۆنفرانسی گشتی کەسایەتییەکانی سەرجەم هۆزەکانی عێراق، کە لەلایەن وەزارەتی ناوخۆوە بە پاڵپشتی و ئامادەبوونی محەمەد شیاع سودانی، سەرۆکوەزیرانی عێراق ڕێکخرابوو و دواتر "موتەڵع"،بەدواداچوونی بۆ کردووە ڕایگەیاند: "هۆزە عێراقییەکان پاڵپشتی سەرەکی ئاسایش و سەقامگیری عێراق بوون و ئێستاش هەروان، بەو پێیەی حکومەتی عێراق گرنگییەکی زۆری بە هۆزەکان داوە لە بەرنامەی حکومی خۆیدا، چ لەسەر ئاستی ئەمنی یان خزمەتگوزاری".
جەختیشی لەوە کردەوە: "مێژووی عێراق پڕە لە چیرۆکی قارەمانێتی کە لەلایەن هۆزە عێراقییەکانەوە تۆمارکراوە لە ڕووبەڕووبوونەوە و تێکشکاندنی چەتەکانی تیرۆریستی داعش".
ئاماژەی بەوەشدا: "ئاسایش و سەقامگیری لە عێراقدا بەبێ بەرپرسیارێتی هاوبەش لەلایەن هەموو لایەکەوە بەدەست نایەت"، بانگەوازی "بەهێزکردنی هاریکاری کۆمەڵایەتی لەگەڵ هێزە ئەمنییەکان" کرد.
لە چوارچێوەیەکی دیکەدا وەزیری ناوخۆ جەختی لە: "پێویستی چڕکردنەوەی هەوڵەکان بۆ بەرەنگاربوونەوەی ماددە هۆشبەرەکان"کردەوە، داوای لە هۆزەکان کرد "بازرگانانی ماددە هۆشبەرەکان داڵدە نەدەن و ڕادەستی دەسەڵاتە پەیوەندیدارەکان بکەن".
وەزیری ناوخۆی عێراق داوای لە هۆزەکانی عێراق کرد کە ڕۆڵێکی گەورەتر ببینن لە بەرەنگاربوونەوەی ماددە هۆشبەرەکان و پاڵپشتی لە هەوڵەکان بۆ بەرتەسککردنەوەی چەک لە دەوڵەت و کۆتاییهێنان بە ململانێ هۆزییەکان، بۆ دەستەبەرکردنی سەقامگیری وڵات و دروستکردنی کەشێکی سەلامەت.
ئاماژەی بەوەشکرد: "سەرکەوتن لە پاراستنی بەرەی دەرەوەی عێراق ڕاستەوخۆ بەشدارە لە پتەوکردنی سەقامگیری ناوخۆ".