وتەبێژی حکومەتی عێراق داوا لە ئەنجوومەنی ئاسایشی نەتەوەیەکگرتووەکان دەکات رۆڵی یۆنامی لە وڵات کەمبکاتەوە

18:16 2024-05-12 19668 عێراق 0

2024-05-12

19668

حکومەتی عێراق رایگەیاند، کۆتاییهاتنی کارەکانی نێرەدی نەتەوەیەکگرتووەکان 'یۆنامی' لە عێراق دەرئەنجامێکی ئاسایی بەرەوپێشچوونی پەیوەندییەکانی نێوان عێراق و یۆنامی و قوڵبوونەوەی پەیوەندیەکانی نێوان عێراق و نەتەوەیەکگرتووەکانە لە ئاستێکی جیاوازدا.

باسم عەوادی، وتەبێژی حکومەتی عێراق لە راگەیەندراوێکدا باسی لەوەكردووە، عێراق پابەندە بە بەرنامەیەکەوە کە لە لایەن ئەنجوومەنی نوێنەرانەوە دەنگی پێدراوە، بەتایبەت لە بواری رێکخستنەوەی پەیوەندیەکانیان لەگەڵ نێردە نێودەوڵەتییەکان، بە جۆرێک لەگەڵ پێشهاتە نوێیەکاندا بگونجێت.

وتەبێژەکەی حکومەت داوای لە ئەنجوومەنی ئاسایشی نەتەوەیەکگرتووەکان کردووە، رۆڵی یۆنامی لە عێراق کەمبکەنەوە و هەڵسەنگاندنێکی بابەتییانە بۆ کارەکانیان ئەنجامبدەن، ئەوەش وەکو ئامادەکارییەک بۆ کۆتاییپێهێنانی یەکجارەکی بەکارەکانیان لە عێراق.

بەوتەی عەوادی، لەسەر داوای حکومەتی عێراق، ئەنجوومەنی ئاسایشی نەتەوەیەکگرتووەکان لیژنەیەکی ئەمنی سەربەخۆیان پێکهێناوە و هەڵسەنگاندنێک بۆ یۆنامی دەکات، لیژنەکەش گەیشتوون بەو ئەنجامەی چیدی پێویست بە مانەوەی یۆنامی لە عێراق ناکات، ئەوەش بە رەچاوکردنی ئەو بەرەوپێشچوونە ئەرێنیانەی لە عێراق بەدەستهاتوون، لە سەرجەم بوارەکانی ئەمنی و سەربازیی و ئابووری و کۆمەڵایەتیدا، هەروەها لە بواری پەیوەندییە هەرێمی و نێودەوڵەتییەکاندا.

سەرەڕای ئەوەی عەوادی سوپاسی رۆڵ و ئامادەیی یۆنامی کرد لە ماوەی 21 ساڵی کاریاندا لە عێراق راشیگەیاند، چاوەڕوانن ئەنجوومەنی نوێنەران لە کۆتایی ئەم مانگەدا بڕیارێک لەبارەی کشانەوەی یۆنامی دەربکەن.