هەڵبژاردنەکانی ساڵی ٢٠٢٥ی عێراق.. ستایشی عەرەبی بۆ بێگەردی و ناوازەیی لەسەر ئاستی هەرێمایەتی

21:54 2025-11-24 40263 عێراق 0

2025-11-24

40263

ئەمڕۆ دووشەممە،فائید مستەفا، باڵیۆز و سەرۆکى شاندى کۆمکاری دەوڵەتانى عەرەبی بۆ چاودێریکردنى هەڵبژاردنەکانی عێراق 2025، جەختی کردەوە کە هەڵبژاردنەکانی عێراق ئەزموونێکی دیموکراسیی ناوازەیە لە ناوچەکەدا.
ڕاگەیەندراوێكی باڵیۆزخانەی عێراق لە قاهیرە، کە دەستى ئاژانسى موتەڵع کەوتووە، ئاماژەى بەوەدا: "قەحتان تاها خەلەف، باڵیۆزى کۆماری عێراق لە کۆماری میسری عەرەبی و نوێنەری هەمیشەیی لە کۆمکاری دەوڵەتانى عەرەبی، لەگەڵ فائید مستەفا، باڵیۆز و یاریدەدەری ئەمینداری گشتی- سەرۆکی کەرتی فەلەستین و خاکە داگیرکراوە عەرەبییەکان و سەرۆکی شاندى کۆمکاری دەوڵەتانى عەرەبی بۆ چاودێریکردنى هەڵبژاردنی ئەنجومەنی نوێنەرانی عێراق بۆ ساڵی 2025، لە بارەگای ئەمینداریەتی گشتیی کۆمکاری دەوڵەتانى عەرەبی کۆبووەوە."

لە ڕاگەیەندراوەكەدا ئەوەش خراوەتەڕوو: "لە سەرەتای دیدارەکەدا، نوێنەری هەمیشەیی عێراق سوپاسی پێشکەش بە یاریدەدەری ئەمینداری گشتی و شاندى کۆمکارەکە کرد کە سەردانی عێراقیان کرد و چاودێری هەڵبژاردنەکانی پێشوویان کرد"، و "ڕێز و پێزانینی خۆی دەربڕی بۆ ئەو ڕاپۆرتەی کە شاندى چاودێرییەکە بڵاوی کردەوە، کە ڕەنگدانەوەی پاکیی پڕۆسەی هەڵبژاردنەکانە."

هەروەها لە ڕاگەیەندراوەكەدا هاتووە: "لەلایەن خۆیەوە، یاریدەدەری ئەمینداری گشتی، ڕێز و پێزانینی خۆی بۆ هەوڵەکانی عێراق لە ئامادەکاریی باش بۆ هەڵبژاردنە پەرلەمانییەکان و بەکارهێنانی ئامێرەکانی بایۆمەتری دەربڕی"، جەختیشیکردەوە کە "ئەمە متمانەی دەنگدەرانی بە پڕۆسەی دیموکراسی بەهێز کرد، کە وەسفی کرد بە ئەزموونێکی ناوازە لە ناوچەکەدا."

لە کۆتایی ڕاگەیەندراوەكەدا هاتووە: "لە کاتی دیدارەکەدا باس لە دۆزی فەلەستین و ئەو ڕووداوانە کرا کە فەلەستین و ناوچەکە پێیدا تێدەپەڕن، هەردوو لایەن جەختیان لەسەر ناوەندێتیی دۆزی فەلەستین و مافی گەلی فەلەستین لە ژیان بە ئازادی و شکۆمەندی کردەوە، هەروەها نوێنەری هەمیشەیی دووپاتی هەڵوێستی پاڵپشتیکاریی عێراقی بۆ فەلەستین لە هەموو بوارەکاندا کردەوە."