هەواڵگری عێراق دەستگیرکردنی دو سەرکردەی داعشی لەدەرەوەی سنوری خۆی راگەیاند

21:00 2023-10-31 55759 عێراق 0

2023-10-31

55759

شانەی راگەیاندنی ئاسایشی عێراق رایگەیاند، دو تیرۆرست بە ناوەکانی "ئەبو عەمار" و "ئەبو مریەم" لەلایەن دەزگای هەواڵگرییەوە لە وڵاتانی دراوسێ دەستگیرکراون، ئەو دو تیرۆرستەش یەکێکیان فەرماندەی تیمی هاوەن و ئەوی دیکەیان فەرماندەی لیوای فەتحی رێکخراوی چەکداری داعشە.
شانەی راگەیاندنی ئاسایشی عێراق لە رایەگەیەنراوێکدا رایگەیاند، دەزگای هەواڵگری نیشتمانی ئۆپەراسیۆنێکی تایبەت لە دەرەوەی سنوری عێراق ئەنجامدا، لە رێگەی ئەو ئۆپەراسیۆنەشەوە دو تیرۆرست بە ناوەکانی عومەر عەواد ناسراو بە "ئەبو مریەم"، یاسر حەسەن ناسراو بە "ئەبو عەمار" دەستگیرکران.
ئاماژە بەوەشکراوە، لە ساڵی 2014 ئەبو مریەم چوەتە ریزی رێکخراوی چەکداری داعش و وەک فەرماندەی تیمی هاوەن دامەزراوە، ئەبو مریەم بەشداربوە لە شەڕکردن دژی هێزە ئەمنییەکان لە جەنگی ئازادکردنی ناوچەکان، دواتر هەڵهاتوە بۆ دەرەوەی عێراق و لەلایەن دەزگای هەواڵگرییەوە لە وڵاتێکی دراوسێ دەستگیرکراوە.

لە بەشێکی دیکەی راگەیەنراوی شانەی ئاسایش ئەوەخراوەتەڕو، ئەبو عەمار بە هەمان شێوە لە ساڵی 2014 چوەتە ریزی چەکدارانی داعش و وەک فەرماندەى لیوای فەتح دامەزراوە، ئەو سەرکردەیەی داعشە کە پارێزگای بابلی لە رێگەی ئۆتۆمبێلێکی بۆمبرێژکراوەوە بەئامانجگرت.
باس لەوەشکراوە، ئەبو عەمار لە ساڵی 2017 بۆ دەرەوەی عێراق هەڵهاتوە و لەم ماوەیەدا لە یەکێک لە وڵاتانی دراوسێ دەستگیرکراوە.