هەرێم.. ئامادەکاریی بۆ حەجی ساڵی داهاتوو دەسپێدەكات ‏

23:42 2025-09-21 22693 كوردستان 0

2025-09-21

22693

ئەمڕۆ یەکشەممە بەرێوەبەرایەتی گشتی حەج و عومڕەی کوردستان ڕایگەیاند، ئامادەکاریی بۆ حەجی ساڵی داهاتو دەسپێدەكات، بە مەبەستی پێشکەشکردنی باشترین خزمەتگوزاری بە حاجیان.
‏
‏بەرێوەبەرایەتی گشتی حەج و عومڕەی کوردستان، لە ڕاگەیەندراوێكدا بڵاویكردەوە، بۆ پرۆسەی حەجی ساڵی داهاتوو 2026 دەست بە ئامادەکارییەکان دەکات بە مەبەستی پێشکەشکردنی باشترین خزمەتگوزاری بە حاجیانی کوردستان
‏
‏ئاماژەی بەوەشكرد، هەریەک لە کاروان ستونی، وتەبێژی بەرێوەبەرایەتی و سیروان عەبدولرحمان، نوێنەری بەرێوەبەرایەتیەکە لە دەستەی باڵای حەج و عومڕەی عیراقی دەستنیشان کراون تاوەکو شانبەشانی دەستەی باڵای حەج و عومڕەی عیراق بەدواداچون و سەردانی ئەو هۆتێلانە بکەن کە بۆ ساڵی داهاتو لە شاری مەدینەی پیرۆز بۆ حاجیانی عیراق و کوردستان دەستنیشان دەکرێن، لەگەڵ چاودێریکردنی ئەو خواردنەی کە بۆ حاجیان ئامادە دەکرێت.
‏
‏بەگوێرەی ڕاگەیەندراوەكە، "وەزارەتی ئەوقاف و کاروباری ئایینی ساڵانە ئامادەکاری باش دەکات، تاوەکو بە باشترین شێوە خزمەتی حاجیانی کوردستان بکرێت و پارساڵ و ساڵانی رابردویش گەواهیدەری ئەو راستەبون کە حاجیان بە چ جۆرێک خزمەت کراون و خزمەتگوزارییان پێشکەش کراوە".
‏لەو بارەیەوە کاروان ستونی، وتەبێژی حەج و عومڕەی کوردستان راگەیاند، بە سوپاسەوە ئەمساڵ راسپێردراوین بۆ ئەوەی ئەو خزمەتە پێشکەش بە حاجیان بکەین و هەر سبەی رێکكەوتی 22ـی (ئەیلول/9) بەرەو شاری مەدینە بەڕێ دەکەوین بۆ دەستپێکردنی ئامادەکارییەکان بۆ پرۆسەی حەجی ساڵی داهاتو 2026.
‏
‏دەشڵێت، "هەوڵدەدەین ساڵ بە ساڵ بە باشترین شێوە خزمەتی حاجیانی کوردستان بکەین و لەوبارەیەوەش سەرکەوتنی گەورەمان بەدەستهێناوە و لە ماوەی سێ ساڵی رابردو پشکی شێری ئەو خەڵاتەمان بەرکەوتوە کە سێ ساڵە شاندی حاجیانی عیراق لەسەر ئاستی هەمو شاندی وڵاتان خەڵاتی لبیتم وەردەگرێت وەکو باشترین شاندنی حاجیان".