نێچیرڤان بارزانی: له‌گه‌ڵ هه‌مو لایه‌نه‌كان له‌هه‌وڵدابوین بۆ راگرتنی شه‌ڕ له‌ حه‌له‌ب

21:24 2026-01-14 23536 كوردستان 0

2026-01-14

23536

نێچیرڤان بارزانی، سه‌رۆكی هه‌رێم رایگه‌یاند، هه‌ر له‌ سه‌ره‌تای روداوه‌كانی حه‌له‌به‌وه‌ له‌گه‌ڵ هه‌مو لایه‌نه‌كان له‌ هه‌وڵدا بوین بۆ راگرتنی شه‌ڕو له‌ هه‌وڵه‌كانیشمان بۆ هێوركردنه‌وه‌ به‌رده‌وامین.

به‌پێی راگه‌یه‌ندراوێكی سه‌رۆكایه‌تی هه‌رێم، ئێواره‌ى ئه‌مڕۆ چوارشه‌ممه‌، نێچيرڤان بارزانى، سه‌رۆكى هه‌رێمى كوردستان، له‌ كۆبونه‌وه‌يه‌كدا له‌گه‌ڵ پاتريك دۆرێل، باڵيۆزى فه‌ڕه‌نسا له‌ عێراق و شاندێكى ياوه‌رى، وێڕاى په‌يوه‌ندييه‌كانى هه‌ردولا، دۆخى ناوخۆى عێراق و هه‌رێمى كوردستان و دوايين پێشهاته‌كانى ناوچه‌كه‌يان تاوتوێ كرد.

ئاماژه‌ به‌وه‌شدراوه‌، هه‌ردولا هيوايان خواست ڕێكاره‌كانى هه‌ڵبژاردنى سه‌رۆككۆمار و ده‌ستنيشانكردنى سه‌رۆكوه‌زيرانى عێراقى فيدراڵ له‌ واده‌ى ياساييى خۆياندا به‌ڕێوه‌ بچن و حكومه‌تێك پێكبێت كه‌ وه‌ڵامده‌ره‌وه‌ى چاوه‌ڕوانييه‌كانى هاوڵاتييان و ئاڵنگارييه‌كان بێت. هه‌روه‌ها جه‌ختيان له‌ گرنگيى په‌له‌كردن له‌ پێكهێنانى كابينه‌ى نوێى حكومه‌تى هه‌رێمى كوردستان كرده‌وه‌.

وه‌ك له‌ راگه‌یه‌ندراوه‌كه‌دا هاتوه‌، هه‌ردولا نيگه‌رانييان ده‌رباره‌ى دۆخى ئاڵۆزى ناوچه‌كه‌ ده‌ربڕى و هاوڕا بون له‌سه‌ر گرنگيى پاراستنى ئارامى و سه‌قامگيرى له‌ ناوچه‌كه‌ و چاره‌سه‌ركردنى كێشه‌كان به‌ ديالۆگ و ڕێگه‌ ديپلۆماسييه‌كان. له‌مباره‌يه‌وه‌ دوپاتيان كرده‌وه‌ كه‌ گرژييه‌كان و ڕوبه‌ڕوبونه‌وه‌ى سه‌ربازى، ئاڵۆزييه‌كانى ناوچه‌كه‌ زياتر ده‌كەن.

ده‌رباره‌ى پێشهاته‌كانى سورياش، نێچيرڤان بارزانی دوپاتى كرده‌وه‌ كه‌ هه‌رێمى كوردستان هه‌مو پشتگيرييه‌ك له‌ مافه‌كانى گه‌لى كورد و هه‌مو پێكهاته‌كان له‌ سوريا ده‌كات. هه‌روه‌ها وتى: هه‌ر له‌ سه‌ره‌تاى ڕوداوه‌كانى حه‌له‌به‌وه‌، له‌گه‌ڵ هه‌مو لايه‌نه‌كان له‌ هه‌وڵدا بوين بۆ ڕاگرتنى شه‌ڕ و پاراستنى سه‌قامگيرى و له‌ هه‌وڵه‌كانمان بۆ هێوركردنه‌وه‌، به‌رده‌وامين.

پرۆسه‌ى ئاشتى له‌ توركيا و چه‌ند پرسێكى ديكه‌ى جێى بايه‌خى هه‌ردولا؛ ته‌وه‌ری ديكه‌ى كۆبونه‌وه‌كه‌ بون.