نێچيرڤان بارزانى لە هەولێر پێشوازى له‌ ڕاوێژکاری کۆشکی ئه‌ليزێ كرد

13:08 2023-10-05 28737 كوردستان 0

2023-10-05

28737

نێچيرڤان بارزانى پێشوازى له‌ به‌رپرسێكى ئه‌ليزێ كرد.
نێچيرڤان بارزانى، سه‌رۆكى هه‌رێمى كوردستان، پێشوازى له‌ پاتریک دورێل ڕاوێژکاری سه‌رۆكى فه‌ره‌نسا بۆ کاروباری ڕۆژهەڵاتی ناوەڕاست و باکووری ئافریقا کرد.
له‌ ديدارەکەدا ده‌ربارەى به‌رنامه‌ى سه‌ردانى چاوه‌ڕوانكراوى ئيمانوئێل ماكرۆن سه‌رۆكى فه‌ره‌نسا بۆ عێراق، په‌يوه‌ندييه‌كانى فه‌ره‌نسا له‌گه‌ڵ عێراق و هه‌رێمى كوردستان و دۆخى ناوخۆى هه‌رێمى كوردستان گفتوگۆ کرا.
بەپێی بەیاننامەیەکی سەرۆکایەتی هەرێم، هه‌ردوولا جه‌ختيان له‌ گرنگي په‌يوه‌ندييه‌كانى فه‌ره‌نسا له‌گه‌ڵ عێراق و هه‌رێمى كوردستان كرده‌وه‌ و ئاماژه‌يان به‌ ڕۆڵ و به‌شداريى كاراى فه‌ره‌نسا له‌ هاوپه‌يمانيى نێوده‌وڵه‌تيى دژى داعشدا كرد، هه‌روه‌ها له‌سه‌ر بايه‌خ و پێويستيى پشتگيريى فه‌ره‌نسا له‌ عێراق له‌م قۆناغه‌دا.
ده‌رباره‌ى دۆخى ناوخۆى هه‌رێمى كوردستانيش، هه‌ردوولا داكۆكييان له‌ گرنگي يه‌كڕيزيى لايه‌نه‌ سياسييه‌كان له‌ هه‌رێمى كوردستان و يه‌كده‌نگى و يه‌ك هه‌ڵوێستييان له‌ به‌غدا كرده‌وه‌، هه‌روه‌ها باسيان له‌ په‌يوه‌ندييه‌كانى هه‌ولێر ـ به‌غدا و گفتوگۆى چاره‌سه‌ركردنى كێشه‌كانيان كرد.
هەروەها دۆخى ئاواره‌ و په‌نابه‌ران و پێكهاته‌كان له‌ هه‌رێمى كوردستان، په‌يوه‌ندييه‌كانى عێراق و هه‌رێمى كوردستان له‌گه‌ڵ وڵاتانى دراوسێ و ناوچه‌كه‌، دوايين پێشهاته‌كانى شه‌ڕى دژى داعش له‌ عێراق و سووريا، دۆخى ناوچه‌كه به‌گشتى‌ و چه‌ند پرسێكى ديكه‌ى جێى بايه‌خى هاوبه‌ش، ته‌وه‌رێكى ديكه‌ى ديداره‌كه‌ بوو.