فائیق زێدان: هەڵبژاردن تاکە گەرەنتی گۆڕانکاری و چاکسازیی ئاشتیانەیە لە عێراق

10:37 2025-10-11 26624 عێراق 0

2025-10-11

26624

سەرۆکی ئه‌نجومه‌نی باڵای دادوەری عێراق له‌باره‌ی هەڵبژاردنه‌وه‌ داوایه‌ك لە هێزە سیاسییەکان دەکات پابەندبن بەوتارێکی هەمەلایەنەی نەتەوەیی و دور لە هاندانی تائیفی یان ناسیۆنالیستی، هاوكات جەخت لەسه‌ر گرنگی بەشداریکردنی کاریگەر لە هەڵبژاردنەکاندا ده‌كاته‌وه‌ و پێیوایە چاکسازی و گۆڕانکاری لە ڕێگەی ئاشتیانە و دەستورییەوە ڕودەدات.

فائیق زێدان، سەرۆکی ئه‌نجومه‌نی باڵای دادوەری عێراق له‌ به‌یاننامه‌یه‌كدا کەدەستی ئاژانسی موتەڵع کەوتووە باسی له‌وه‌كردوه‌، "هەڵبژاردن بناغەی هەر سیستەمێکی دیموکراسییە، ئەو ئامڕازانەیە کە خەڵک لە ڕێگەیەوە ئیرادەی خۆی دەردەبڕێت بۆ هەڵبژاردنی نوێنەری خۆی لە دەسەڵاتی یاسادانان و جێبەجێکردن، بەوپێیەی مومارەسەیەکی کاریگەرە بۆ مافی هاوڵاتیان بۆ بەشداری سیاسی و دیاریکردنی ئایندەی وڵاتەکەیان".
ئاماژه‌ی به‌وه‌شكردوه‌، هەڵبژاردن شەرعیەت بە دەسەڵات دەبەخشێت، دەستەبەرکردنی گواستنەوەی ئاشتیانەی دەسەڵات ڕودەدات، هەروەها ڕێگری لە قۆرخکردنی دەسەڵات و دەستەڵاتداران دەکات، بەرپرسانی ستەمکار لێپرسینەوەیان لەگەڵ دەکرێت، هه‌ڵبژاردن دەرفەت بە خەڵک دەڕەخسێنێت بۆ نوێکردنەوە یان گۆڕینی هەڵوێستەکانیان لەسەر بنەمای ئەدای کارکردن و بەرژەوەندی گشتی.
سەرۆکی ئه‌نجومه‌نی باڵای دادوەری عێراق وتیشی، "لەگەڵ نزیکبونەوەی هەڵبژاردنی پەرلەمانی عێراق كه‌ 11ی تشرینی دوەمی 2025 به‌ڕێوه‌ده‌چێت، گرنگی بەشداریکردنی کاریگەر بۆ هەر هاوڵاتییەک ڕون دەبێتەوە کە لەو ڕێگەیەوە چاکسازی و گۆڕانکاری لە ڕێگەی ئاشتیانە و دەستورییەوە ڕودەدات، کە بە ڕونیترین شێوە لە هەڵبژاردنەکاندا بەرجەستە دەبن".
ئه‌وه‌شی خستوه‌ته‌ڕو، "لەم چوارچێوەیەدا پێویستە داوا لە هەمو هێز و کاندیدە سیاسییەکان بکەین کە پابەندبن بەوتارێکی هەمەلایەنەی نەتەوەیی و دور لە هاندانی تائیفی یان ناسیۆنالیستی".

سەرۆکی ئه‌نجومه‌نی باڵای دادوەری ڕونیكرده‌وه‌، "دەسەڵاتی دادوەری لەڕێگەی ئەو ڕۆڵەی کە لە دەستور و یاسادا دیاریکراوە، پابەندبونی تەواوی خۆی دوپاتدەکاتەوە بۆ دەستەبەرکردنی چاودێری بێلایەنانە، پاراستنی دەنگی دەنگدەران، دەستەبەرکردنی یەکپارچەیی و شەفافیەتی پڕۆسەی هەڵبژاردن لە هەمو قۆناغەکاندا".