عێراق داوا لە كۆمەڵگەی نێودەوڵەتی دەكات هەڵوێستیان هەبێت بەرامبەر بە پێشێلكارییەكانی ئیسرائیل

23:19 2025-06-14 68657 عێراق 0

2025-06-14

68657

فوئاد حسێن جێگری سەرۆك وەزیران و وەزیری كاروباری دەرەوە داوای لە ئەڵمانیا و كۆمەڵگەی نێودەوڵەتی كرد هەڵوێستیان هەبێت بەرامبەر بە پێشێلكارییەكانی ئیسرائیل.
‏
‏لە بەیاننامەیەكی وەزارەتی دەرەوە دا هاتووە : ئەمڕۆ شەممە ، فوئاد حسێن جێگری سەرۆك وەزیران و وەزیری دەرەوە پەیوەندییەكی تەلەفۆنی لەلایەن وەزیری دەرەوەی كۆماری فیدراڵی ئەڵمانیا، یۆهان وادیفۆلەوە پێگەیشت، لەو ماوەیەدا گفتوگۆیان لەسەر دوایین پێشهاتەكانی ڕۆژهەڵاتی ناوەڕاست و ئاستەنگە ئەمنییەكان كرد كە ڕووبەڕووی ناوچەكە بوونەتەوە، بەتایبەتی لە ژێر ڕۆشنایی پەرەسەندنی ناوچەكەدا.
‏ئاماژە بەوەشكراوە : پەیوەندییەكە شایەتحاڵی ئاڵوگۆڕی بیروڕا و زانیارییە سەبارەت بە دۆخی ئێستا، لەگەڵ ئەوەی وەزیری ئەڵمانیا و پابەندبوونی وڵاتەكەی بۆ پشتیوانیكردن لە ئاسایش و سەقامگیری عێراق دووپاتكردووەتەوە، جەختیشیكردووەتەوە پێویستی دوورخستنەوەی عێراق لە هەر ڕووبەڕووبوونەوەیەكی سەربازی یان كاردانەوەی ئەگەری ململانێكان.
‏ڕوونیشیكردەوە : ئەڵمانیا لەگەڵ هاوبەشە ناوچەیی و نێودەوڵەتییەكانی كاردەكات بۆ ئەوەی عێراق نەكێشێتە ناو بازنەی توندوتیژی، ئاماژەی بەوەشكرد ئێمە ئاسایش و سەقامگیریمان دەوێت بۆ عێراق.
‏لە بەیاننامەكەدا هاتووە : حسێن و وادیفۆل جەختیان لە گرنگی درێژەدان بە پرۆسەی دانوستانەكانی نێوان ئێران و ئەمریكا و هەروەها لەگەڵ وڵاتانی ئەورووپایی سەبارەت بە بەرنامەی ئەتۆمی ئێران كردەوە، وەك هەنگاوێكی بنەڕەتی بەرەو كەمكردنەوەی گرژییەكان.
‏جەختی لەوە كردەوە : كە وەزیری دەرەوە سوپاس و پێزانینی خۆی بۆ هەڵوێستی ڕوون و پاڵپشتیكارانەی ئەڵمانیا بەرامبەر عێراق دەربڕی، هاوكات لە هەمان كاتدا هۆشداریدا لە پێشێلكارییە دووبارەبووەكانی زایۆنیستەكان بۆ سەر ئاسمانی عێراق، كە پێشێلكارییەكی ئاشكرای یاسا نێودەوڵەتییەكان و سەروەری نیشتمانی پێكدەهێنن، داوای لە ئەڵمانیا و كۆمەڵگەی نێودەوڵەتی كرد هەڵوێستێكی پتەوی بەرامبەر ئەو پێشێلكارییانە بگرنەبەر.