شیعەکان شەڕی تێپەڕاندنی هەمواری یاسای باری کەسێتی دەکەن

21:37 2024-08-05 88709 عێراق 0

2024-08-05

88709

کاروان یاروەیس بڕیاردەری فراکسیۆنی یەکێتی لە پەرلەمانی عێراق بە دەنگی ئەمەریکای ڕاگەیاند، شیعەکان شەڕی تێپەڕاندنی هەمواری یاسای باری کەسێتی دەکەن کە ڕێگا بە هاوسەرگیری پێشوەختە دەدات و دادگاگان بەلاوە دەنێت و دەسەڵات دەدات بە مەلا و سەیدی حوسەینییە و مزگەوتەکان، ئەوکات دەتوانن بە ئارەزووی خۆیان بڕیار بدەن کچەکە 'بلوغ' بووە یاخود نا بۆ ئەنجامدانی هاوسەرگیری.
وتیشی: ڕاستە یاسای باری کەسێتی عێراق کۆنە و دەگەڕێتەوە بۆ ساڵی 1959، بەڵام لە ئێستادا هیچ گرفتێکی تێدا نیە، چونکە هەر یاسایەک داوای هەمواری دەکرێتەوە، دەبێت باشتر بکرێت و بەرگێکی نوێی بە بەردا کرابێت نەک بەرەو دواوەی ببات، لە ڕاستیدا ئەم هەموارە عێراق بەرەو دواوە دەبات و تووشی ئیحراجبوونێکی گەورەی نێوخۆیی و دەرەکیشی دەکات، چونکە تەمەنی شووکردنی بۆ کچان بە شێوەیەکی لاستیکی دانراوە، دەتوانرێت بە ئاسانی لە مزگەوت و حوسەینییەکان یاری پێبکریت و تەمەنەکەی دیارینەکردووە و دەڵێت تەمەنی پێگەشتن، بۆیە دەکرێت لە تەمەنی نۆ ساڵ بۆ سەرەوە ئەو کچە بدرێت بە شوو.
بەشێک لە پەرلەمانتار و فراکسیۆنەکانی شیعە بەتایبەت ئیتاری تەنسیقی پشتیوانی لە هەموارەکە دەکەن و لایەنە شیعەکان دەتوانن تێیپەڕێنن، چونکە زۆرینەن و لە هەوڵدان بۆ ڕازیکردنی سوننە هەتا دەنگ بەو یاسایە بدەن و بۆ ئەوەش تا ڕادەیەک سازشیان کردووە بۆ تێپەڕاندنی هەمواری یاسای لێبوردنی گشتی، بەڵام بۆ شیعە دەنگدان بەو هەموارە تووشی ئیحراجبوونیان دەکات لەلای شەقامی شیعی.
کاروان یاروەیس دەشڵیت: هەمواری یاسای باری کەسێتی بە دڵنیاییەوە تێدەپەڕێنرێت، بەڵام گەر هەموار کرایەوە کوردستان دەتوانێت کاری پێنەکات، ئەوەی دەکرێت ستەمێکی گەورەیە لە کچانی عێراق دەکرێت و پێویستە ڕێگا نەدرێت بە تێپەڕاندنی، چونکە دواجار دەیان کێشەی تەندروستی و کۆمەڵایەتی بۆ ئەو کچانە دروست دەبێت کە هاوسەرگیری پێشوەختە دەکەن و کورد بە هیچ شێوەیەک لەگەڵ ئەم هەموارەدا نیە.