سەرۆک کۆمار: خەمخۆری بۆ بنەماڵەی شەهیدان و قوربانیان لە پێشینەی کارەکانمانە

14:27 2024-01-23 51436 عێراق 0

2024-01-23

51436

سەرۆک کۆمار لە میانەی دیدارێکیدا لەگەڵ کەسوکاری شەهیدان و قوربانیانی دەستی تیرۆر دوپاتیکردەوە، کە قوربانیدانی عیراقییەکان لە شەڕی دژی تیرۆردا، لە یادەوەری مێژوودا دەمێنێتەوە.
نوسینگەی راگەیاندنی سەرۆک کۆمار لەراگەیەندراوێکدا بڵاویکردەوە سەرۆک کۆمار د.لەتیف جەمال رەشید ئەمڕۆ سێشەممە 23-1-2024 لە کۆشکی بەغداد پێشوازیکرد لە وەفدێکی دامەزراوەی (قەنادیل ئەلڕەحمە) بۆ شەهیدان و قوربانیانی دەستی تیرۆر.
لەدیدارەکەدا، سەرۆک کۆمار جەختیکردەوە، کە قوربانیدانی عیراقییەکان لە شەڕی دژی تیرۆردا، لە یادەوەری مێژوودا دەمێنێتەوە بەوپێیەی پایەی بنەڕەتی ئەو ئاسایش و سەقامگیرییەیە، کە ئێستا وڵات بەخۆوەدەبینێت. هەروەها دوپاتیکردەوە، خەمخۆریی بۆ قوربانیدەران و کەسوکاری شەهیدان لە پێشینەی کارەکان و گرنگیدانی سەرۆکایەتی کۆمارە بەم بەشە بەخشندەیەی وڵات.

هەروەها بەڕێزیان تیشکی خستەسەر بایەخی بەدواداچوون بۆ دەرکردنی رێنماییەکان سەبارەت بە یاسا و بڕیارە پەیوەندیدارەکان بەم بەشەی کۆمەڵگە لە لایەن لایەنە پەیوەندیدارەکان بەمەبەستی دڵنیابوون لە دابینکردنی ژیانێکی ئازاد و شکۆمەندانە بۆیان وەک وەفایەک بۆ ئەوەی پێشکەشیانکردووە بەمەبەستی بەدەستهێنانی سەرکەوتن بەسەر گروپە تیرۆریستییەکاندا.

هەروەها سەرۆک کۆمار گوێبیستی رونکردنەوەی ئەندامانی وەفدەکە گرت سەبارەت بە کارەکانی دەزگای (قەنادیل ئەلڕەحمە) و بەرنامەکانی بۆ بەدەنگەوەچونی بنەماڵەی شەهیدان و قوربانیان و ئەو ئاستەنگانەی لەبەردەم سەرخستنی کارەکانیاندا هەیە. وەفدەکە پەرۆشیی بەڕێز سەرۆک کۆماری بۆ گرنگیپێدان بەو چینە قوربانیدەرە، بەرزنرخاند.