سەرۆك کۆمار بەبۆنەی هاتنەوەی مانگی پیرۆزی رەمەزانەوە پەیوەندییەکی تەلەفۆنی لە سەرۆکی میسرەوە پێگەیشت

01:38 2024-03-11 33326 عێراق 0

2024-03-11

33326

سەرۆك کۆمار د.لەتیف جەمال رەشید بەبۆنەی هاتنەوەی مانگی پیرۆزی رەمەزانەوە پەیوەندییەکی تەلەفۆنی لە عەبدولفەتاح سیسی سەرۆك کۆماری میسری عەرەبییەوە پێگەیشت.
نوسینگەی راگەیاندنی سەرۆکایەتی کۆمار لەبەیانامەیەکدا رایگەیاند:- عەبدولفەتاح سیسی سەرۆك کۆماری میسر لە پەیوەندییەکی تەلەفونیدا بەبۆنەی هاتنەوەی مانگی پیرۆزی رەمەزانەوە پیرۆزبایی ئاراستەی سەرۆك د.لەتیف جەمال رەشید کردو هیوای بەرقەراربونی زیاتری ئاسایش و سەقامگیری و خۆشگوزەرانی بۆ گەلی عێراق خواست.
لەبەرامبەردا سەرۆك کۆمار د.لەتیف جەمال رەشید بەبۆنەی هاتنەوەی مانگی پیرۆزی رەمەزانەوە جوانترین پیرۆزبایی خۆی ئاراستەی سەرۆك کۆماری میسر کرد و هیوای بەردەوامیی پێشکەوتن و خۆشگوزەرانی بۆ گەلی میسری برا خواست.
هەر لە میانی پەیوەندییە تەلەفۆنییەکەدا، هەردوو سەرۆك باسیان لە پتەوکردنی پەیوەندییەکانی نێوان هەردوو وڵات و فراوانکردنی رێگاکانی هاریکاری بۆ خزمەتکردنی بەرژەوەندییە هاوبەشەکانی هەردوو وڵات کرد.
هەروەها دۆخی ناوچەکە و کەرتی غەززەیان تاووتوێکرد و جەختیان لەسەر پێویستی راگرتنی پەلاماری دوژمنکارانە و تاوانه قێزەونەکان کردەوە، که بەرامبەر گەلی فەڵەستین ئەنجامدەدرێت. هەروەك دوپاتیانکردەوە کە پێویستە کۆمەڵگەی نێودەوڵەتی بەرپرسیارێتیی خۆی بگرێتەئەستۆ بۆ راگرتنی بۆردومانه بەردەوامەکان و دڵنیابون لە گەیشتنی هاوکاری و کۆمەکە مرۆییەکان بە گەلی فەڵەستین.