سودانی لەبارەی دەنگدانی کارمەندانی هێزە ئەمنییەکان راسپاردەی توند ئاڕاستەی فەرماندە سەربازی وئەمنییەکان دەکات

11:26 2023-12-05 26429 عێراق 0

2023-12-05

26429

محه‌مه‌د شیاع سودانی سه‌رۆكی ئه‌نجومه‌نی وه‌زیران فه‌رمانی كرد كه‌ده‌بێت كارمه‌ندان و ده‌زگاكانی ئه‌منی له‌ده‌نگدان ئازادبن لە دەنگدانی تایبەتدا و بەهیچ شێوەیەک دەستێوەردان لە هەڵبژاردەکانیاندا نەکرێت.
لیوای یەحیا ڕەسوڵ عەبدوڵا وتەبێژی فەرماندەی گشتی هێزە چەکدارەکان له‌راگه‌یه‌ندراوێكدا كه‌بۆ ئاژانسی هه‌واڵی عێراقی ناردووه‌ راگه‌یاندووه‌" لە پێناو سەلامەتی پرۆسەی هەڵبژاردن و دوورکەوتنەوە لە هەر کاریگەرییەکی نەرێنی، فەرماندەی گشتی هێزە چەکدارەکان محەمەد شەیاع سودانى، هەموو سەرکردە سەربازی و ئەمنییەکان لەگەڵ فەرماندە و بەڕێوەبەرانی دەزگا ئەمنییەکان و فەرماندەکانی پێکهاتە ئەمنی و سەربازییەکانی ڕاسپارد بۆ ئەوەی کاربکەن و پابەند بن بە دەستەبەرکردنی هەڵبژاردنێکی ئازاد بۆ کارمەندان و هێزە چەکدارەکان لە دەنگدانی تایبەتدا و بەهیچ شێوەیەک دەستێوەردان لە هەڵبژاردەکانیاندا نەکەن.
هەروەها سودانی فەرمانی کرد بە قەدەغەکردنی هەر ئاماژەیەک یان دەستەواژەیەک کە کارمەند و چەکدارەکان وەک فەرمانی هەڵبژاردن لێی تێبگەن و جەختیشی کردەوە لەسەر پێویستی گرتنەبەری بەرزترین حاڵەتەکانی کۆنترۆڵکردن و بەدواداچوون سەبارەت بە هەر حاڵەتێکی دەستێوەردان لە هەڵبژاردەکانی هەڵبژاردندا یان بەستنەوەی لە نێوان دەنگی لایەنی هەڵبژاردن و کارمەنددا.
فەرماندەی گشتی هێزە چەکدارەکان لە ڕاسپاردەکانیدا جەختی کردەوە لەسەر گرنگی هەڵبژاردنێکی ئازاد بۆ کارمەندان و چەکداران وەک ئەو هاوڵاتیانەی کە دەستوور و یاسا دەپارێزن بە ئازادی هەڵبژاردنە سیاسییەکانیان، هەروەها چۆن ئەوان پارێزراون لە هەر فشارێک یان هەوڵێک بۆ کاریگەریکردن دژی خواست و هەڵبژاردەکانیان.