محەمەد شیاع سودانی، سەرۆک وەزیرانی عێراق له‌میانی كۆبونه‌وه‌یه‌كدا له‌گه‌ڵ شاندێکی ژوری بازرگانی ئەمریکا ڕایگه‌یاند، عێراق ڕۆژانە چوار ملیۆن بەرمیل نەوت بەرهەم دەهێنێت، لەهەمان کاتیشدا غاز هاوردە ده‌كات بۆ کارپێکردنی وێستگەکانی کارەبا، ده‌شڵێت، "پڕۆژەی ڕێگای گەشەپێدان کورتترین ڕێڕەوی ئابوری دەبێت کە ئاسیا بە ئەوروپا دەبەستێتەوە، هەروەها کەمترین تێچوی گواستنەوەی کەلوپەل دەبێت".

به‌گوێره‌ی ڕاگه‌یه‌ندراوێكی نوسیگه‌ی سه‌رۆك وه‌زیرانی عێراق، محەمەد شیاع سودانی له‌میانی كۆبونه‌وه‌یه‌كدا لەگەڵ ژمارەیەک لە سەرکردە بازرگانییەکانی ئەمریکا و وەبەرهێنەرانی ئەمریکا، بە ئامادەبونی بەرپرسی کاروباری ئەمریکا لە باڵیۆزخانەی ئەمریکا لە عێراق، پێشوازی لە شاندێکی گەورەی ئابوری کرد لە ژوری بازرگانی ئەمریکا، رایگه‌یاند، "عێراق بازاڕێکی فراوان و هەمەچەشن بۆ بەرهەم و کاڵا و خزمەتگوزاری جۆراوجۆر پێشکەش دەکات".
ئاماژه‌ی به‌وه‌شكرد، گەلی عێراق لە ڕوبەڕوبونەوەی تیرۆر و دانانی بناغەکانی ڕێنێسانسی گەشەسەندنیاندا دەستکەوتی زۆری بەدەستهێناوە، ناوبراو ئاماژەی بە گرنگی پاراستنی پەیوەندییە دوقۆڵییەکان لەگەڵ ئەمریکا کرد، بەتایبەتی بە لەبەرچاوگرتنی ئەوەی کە عێراق ئەمڕۆ وەک مۆدێلێکی دیموکراسی دیار لە ناوچەکەدا وەستاوە.
له‌ ڕاگه‌یه‌ندراوه‌كه‌دا هاتوه‌، بەهۆی شەڕی هەشتاکانی سەدەی ڕابردو (ئێران - عێراق) و گەمارۆدانی نەوەدەکان و شەڕی تیرۆر بە درێژایی دو دەیەی ڕابردو گەشەسەندنی عێراق لە هەمو سێکتەرەکاندا دواکەوتوە، به‌ڵام وڵاته‌كه‌ خاکێکی گرنگی هەیە بۆ هەلی وەبەرهێنان لە هەمو سێکتەرەکاندا.
سودانی هه‌روه‌ها باسی له‌وه‌كردوه‌، "ئەمڕۆ عێراق سەقامگیری سیاسی و ئەمنی و کۆمەڵایەتی و ئابوری هه‌یه‌، شاهیدی گۆڕانكاریه‌كی گەشەسەندنی بێ وێنەیە، جگه‌ له‌وه‌ی عێراق خاوەنی هێزێکی کاری لێهاتوە و لێهاتویی ئومێدبەخشمان هەیە لە بوارە جیاجیاکاندا".
په‌یوه‌ست به‌ كاری كابینه‌كه‌ی، سه‌رۆك وه‌زیرانی عێراق وتی، "حکومەتەکەمان کاری کردوە بۆ باشترکردنی ژینگەی بازرگانی، هەروەها هەوڵمان داوە بۆ چاکسازی لە یاساکان بۆ ئاسانکاری تۆمارکردن و کارپێکردنی کۆمپانیاکان لە عێراق".
ئه‌وه‌شی خسته‌ڕو، "عێراق وڵاتێکی پیشەسازی و کشتوکاڵییە و ڕێگه‌یه‌كی كورتی بازرگانی هه‌یه‌ كه‌ لە ڕۆژهەڵات و ڕۆژئاواوە لە ڕێگەی تورکیاوە بۆ ئەوروپا تێدەپەڕێت، پڕۆژەی ڕێگای گەشەپێدان کورتترین ڕێڕەوی ئابوری دەبێت کە ئاسیا بە ئەوروپا دەبەستێتەوە، هەروەها کەمترین تێچوی گواستنەوەی کەلوپەل دەبێت".

په‌یوه‌ست به‌ به‌رهه‌مهێنانی نه‌وت، سودانی وتی، "عێراق ڕۆژانە 4 ملیۆن بەرمیل نەوت بەرهەم دەهێنێت، بەڵام غازی پەیوەندیدار هەڵدەگیرێت، لەهەمان کاتیشدا ئێمە غاز هاوردە دەکەین بۆ کارپێکردنی وێستگەکانی کارەبا، حکومەتەکەمان دیدگایەکی بۆ پڕۆژەکان داڕشتوە، دەستیکردوە بە جێبەجێکردنی گرێبەست لەگەڵ کۆمپانیا نێودەوڵەتییەکان و تا سەرەتای ساڵی 2028 هەڵدانی غاز ڕادەگرێت".