سەرۆکی ئەنجومەنی وەزیران محەمەد شەیاع سودانى و سەرۆکی تورکیا ڕەجەب تەیب ئەردۆغان سەرۆکایەتی شاندی هەردوو وڵات دەکەن لە وتووێژە فراوانەکاندا، کە ئەمڕۆ دووشەممە لە کۆشکی حکومەت لە بەغدا بەڕێوەچوو.

نوسینگەی راگەیاندنی سەرۆک وەزیران لە بەیاننامەیەکدا بڵاوی کردەوە:-لە کۆبوونەوەکەدا تاوتوێی ڕێککەوتنی چوارچێوەی ستراتیژی کرا، کە نوێنەرایەتی نەخشەڕێگایەک دەکات بۆ بنیاتنانی هەماهەنگی ستراتیژی بەردەوام و جەختکردنەوە لەسەر گرنگی ڕێگای گەشەپێدان لە ڕووی ئابووری و پتەوکردنی یەکخستنی ئابووریەوە.

لە وتووێژەکاندا باس لە پەرەپێدانی پەیوەندییە بازرگانی و ئابوورییەکان و زیادکردنی بازرگانی و هاندانی وەبەرهێنان لەسەر ئاستی فەرمی کرا لە ڕێگەی لیژنەی هاوبەشی ئابووری نێوان هەردوو وڵاتەوە و هەوڵدان بۆ چالاککردنی ئەنجومەنی بازرگانی عێراق و تورکیا و کردنی بە پلاتفۆرمێک کە هەردوولا لە ڕێگەیەوە ئەزموونی کرداری خۆیان ئاڵوگۆڕ بکەن و بەشداری بکەن لە بەهێزکردنی هاریکاری و پەرەپێدانی پڕۆژەکان لە هەردوو وڵاتدا.

هەر لە میانەی وتووێژەکاندا جەخت کرایەوە لەسەر پتەوکردنی ئاسایشی هاوبەشی نێوان هەردوو وڵات و ڕێگە نەدەن ناوچەکانی هەردوو وڵات ببنە سەرچاوەیەک بۆ دەستدرێژی لەنێوانیاندا.

هەروەها جەخت لەوە کرایەوە کە پێویستییەکی ڕاستەقینە هەیە بۆ دامەزراندنی دامەزراوە پیشەسازییە هاوبەشەکانی عێراق و تورکیا لە ناوخۆی عێراق بە سەرمایەی هاوبەش و ئاسانکردنی ڕێکارەکانی پێدانی ڤیزە بە هاوڵاتیانی عێراق بە مەبەستی گەشتیاری و بازرگانی و وەبەرهێنان و چارەسەر و خوێندن.

لە ڕووی ڕۆشنبیرییەوە هەردوولا ڕێککەوتن لەسەر گرتنەبەری هەنگاوەکان بۆ جێبەجێکردنی پڕۆژە هاوبەشەکان بە ئامانجی بەهێزکردنی پەیوەندییە کۆمەڵایەتی و مرۆییەکان و پەرەپێدانی هەماهەنگییەکی گشتگیر لە بواری خوێندنی باڵا و ئاڵوگۆڕی خولەکان و دانپێدانانی یەکتری زانکۆکان و دروستکردنی قوتابخانە و ئاڵوگۆڕی کولتووری لە هەموو بوارەکاندا.

لە میانەی وتووێژەکاندا ڕێککەوتن لەسەر هەماهەنگیکردن لە بواری ئاو و داڕشتنی بەشداریکردن و تێڕوانینێکی گشتگیر بۆ بەرژەوەندییەکانی هەردوولا لە پڕۆژەکانی ژێرخانی ئاودێری و بەڕێوەبردنی ئاو، هەروەها خستنەڕووی دۆسیەکانی هەماهەنگی هاوبەش کە پەیوەستە بە بوارەکانی کشتوکاڵ و کارەبا و تەندروستی و وەرزش و لاوانەوە.

پێش دانیشتنە فراوانەکەی وتووێژەکان، کۆبوونەوەیەکی دوولایەنە ئەنجامدرا لە نێوان بەڕێز سودانی و بەڕێز ئەردۆغان کە تیایدا باس لە سەرجەم پەیوەندییەکانی نێوان هەردوو وڵات و چۆنیەتی پەرەپێدانیانی کەرتە جیاوازەکان و دۆسیەکانی بەرژەوەندی هاوبەش کرا، هەروەها باس لە پێشهاتەکانی ڕووداوەکانی ناوچەکە کرا و جەختکرایەوە لەسەر گرنگی هەماهەنگیکردنی هەڵوێستەکان بۆ ڕاگرتنی هێرشەکانی دژ بە فەڵەستینییەکان لە غەزە و ئامرازەکانی ڕێگریکردن لە بڵاوبوونەوەی ململانێ و گرژیەکان لە ناوچەکەدا.