رونکردنەوەیەک لە وەزارەتی رۆشنبیری لەبارەی کتێبەکانی پێشانگای کتێبی سلێمانیەوە

19:31 2023-11-25 92575 كوردستان 0

2023-11-25

92575

وەزارەتی رۆشنبیری و لاوانی هەرێم رایگەیاند، سەرجەم ئەو دەزگا و خانەی بڵاوکردنەوانەی لە پێشانگای کتێبی سلێمانی بەشدارن خاوەنی مۆڵەتن و رێ لە هیچ کتێبفرۆشێکی ئیسلامی و عەلمانی نەگیراوە، ئەوانەشی گلەیی دەکەن با پێشانگا پڕبکەن لە کتێبی فکر و فەلسەفە.
وەزارەتی رۆشنبیری و لاوانی هەرێم لە راگەیەنراوێکدا بڵاویکردەوە، وەزارەتی ڕۆشنبیری و لاوان بۆ ماوەی (45)ڕۆژ لە ڕۆژنامەكانی "كوردستانی نوێ" و ڕۆژنامەی "هەولێر" ئاگاداری بڵاوكردەوە، بە لە بەرچاوگرتنی سەرجەم ڕێكارە یاساییەكان بۆ سەرجەم دەزگا ڕۆشنبیرییەکان و خانەكانی چاپ و بڵاوكردنەوە، داواكراوه هەر لایەنێك دەتوانێت هاوكاری وەزارەت بكات بۆ كردنەوەی پێشانگای كتێب لە سلێمانی با بێت و فۆرمی تەندەر وەربگرێت.

ئاماژە بەوەشکراوە، هیچ دەزگایەك بۆ وەرگرتنی فۆرمی تەندەر نەهاتوە، تەنها ده‌زگای "چاپ و په‌خشی ئه‌تڵه‌س"، كە ئێستا پێشانگه‌كەی كردوه‌تەوە، سەرجەم ئەو دەزگا و خانانەی بڵاوكردنەوە و كتێبفرۆشی، كە ئێستا لە پێشانگه‌ بەشدارن و خاوەن ستاندن لە پێشانگاكە، لە هەرێمی كوردستان مۆڵەت پێدراون و خاوەنی نوسینگەی دەزگای ڕۆشنبیری، یان خانەی چاپ و بڵاوكردنەوە، یاخود دوكانی كتێبفرۆشین .

ئەوەشخراوەتەڕو، هیچ دەزگا، خانە و كتێبفرۆشێك ئیسلامی، یان عه‌لمانی ئەوەی خۆی خواستی هەبوبێت بەشداربێت لە پێشانگه‌كەدا ڕێی لێ نەگیراوە لە بەشداربون. ئەوانەی گلەیی دەکەن، با پێشانگه‌ پڕبكەن لە کتێبی فكر، فەلسەفە، زانست و بەرهەمەكانیان، بزانن هیچ ڕێگرییەك هەیە؟
باس لەوەشکراوە، ئەگەر قسە و گلەیی لەسەر زۆری كتێبی ئایینیە، کتێبی ئاینی یاساغ نییە، هەموان دەبێت ئەوە بزانین لە ھەرێمی كوردستان ئەم بابەتە بەیاسا ڕێكخراوە.
وەزارەتی رۆشنبیری و لاوان ئەوەشی ئاشکرا کردوە، دەقی یاساکەش بریتییە بە پێی یاسایی چاپەمەنی هەرێمی کوردستان ژمارە (10) ساڵی 1993 لە ماددەی دوەمدا دەڵێت، ڕەقابە لەهەرێم ناخرێتە سەر چاپەمەنی، هەر هاوڵاتییەک سەربەستە لەدەرکردنی هەر چاپەمەنییەک، بەپێی حوکمی ئەم یاسایە.