ئەمرۆ پێنجشەممە (24ی ئابی 2023)، رۆژنامەنووس "ئیسلام كەشانی" بەرپرسی نوسینگەی كەناڵی ئاسمانی سپێدە لە زاخۆ و ڕۆژنامەنووس لە کەناڵی خابیر دەستگیر کرا. 
ماهر سەگڤان، بەرپرسێ كەناڵی خابیر تیڤی، بە سەنتەری میترۆی ڕاگەیاند: "ئەمرۆ كاتژمێر 9:45، رۆژنامەنوس ئیسلام كەشانی بە مەبەستی چوون بۆ كاری میدیایی خۆی لە نوسینگەی كەناڵی ئاسمانی سپێدە و دەزگای خابیر، لە ماڵ دەرچوو، پێش ئەوەی بگاتە شوێنی كارەكەی لە گەڕەكی سەفینی زاخۆ، هێزێكی ئاسایش بێ ئەوەی ھیچ بڕیارێكی دادگایان پێ بێت دەیگرن و دەیڕفێنن".
وتیشی "هێزە ئەمنییەكە تەنها بەم رەفتارەوە نەوەستاون، كاتژمێر 1ی دوای نیوەرۆ بێ ئەوەی بڕیاری دادگایان پێ بێت دور لە ئاكار و بەشێوازێكی ناشارستانی و لەبەرچاوی مناڵەكانی هەڵیانكوتاوەتە سەر ماڵی ئیسلام كەشانی لە گەرەكی چرا و ماڵەكەی پشكینیوە، دوای ئەوەی هیچیان دەستنەكەوتوە گەڕانەوە".
ئەمە دووەم حاڵەتی دەستگیرکردنی ڕۆژنامەنووسانە لە زاخۆ لە ماوەی چەند ڕۆژێک، دوای ئەوەی رۆژنامەنوس و پەیامنێری میدیایی (964) شڤان عەبدوڵا لەناو بازاڕی زاخۆ لەلایەن ئاسایش بەبێ بڕیاری دادگا دەستگیردەكریێت و لە دواییدا ئازاد دەكرێت".
سەنتەری میترۆ بۆ داکۆکیکردن لە مافی ڕۆژنامەنووسام سەرکۆنەی دەستگیركردنی رۆژنامەنوس (ئیسلام كەشانی) کرد و داوا لە هێزە ئەمنیەكانی ئیدارەی سەربەخۆی زاخۆ دەكات دەستبەجێ رۆژنامەنوس ئیسلام كەشانی ئازادبكرێت.
لەم بارەیەوە، تۆڕی میدیایی یەکگرتوو سەبارەت بە ڕفاندنی ڕۆژنامەنووس ئیسلام كەشانی ڕاگەیەندراوێكی بڵاوكردەوە وتێیدا ڕایگەیاند: بە توندی ئیدانەی ئەم کردارە نا بەرپرسانەیە دەکەین و داواکارین بە زووترین کات ئازاد بکرێت. 
لە ڕاگەیندراوێکی تۆڕی میدیایی یەکگرتووی ئیسلامی کوردستان سەبارەت بە دەستگیرکردنی بەرپرسی نووسینگەی کەناڵی ئاسمانی سپێدە لە زاخۆ ڕایگەیاند: "هەموو لایەک ئاگادار دەکەینەوە کە رۆژنامەنووس و کەسایەتی دیاری زاخۆ (ئیسلام کەشانی)  پێش نیوەڕۆی ئەمرؤ پێنجشەممە بە مەبستی چوون بۆ کاری میدیایی خۆی لە نوسینگەی کەناڵی ئاسمانی سپێدە و دەزگای خابیر، لە ماڵ دەرچووەو پێش ئەوەی بگاتە شوێنی فەرمی کارەکەی، هێزێکی ئاسایش دەیگرن و دەیڕفێنن".
ئاماژەی بەوەشكرد: ئەم هەنگاوەی ئاسایشی زاخۆ پێچەوانەی یاسای رۆژنامەگەری کوردستان ژمارە 35ـی ساڵی 2007ە، کە لەو یاسایەدا هاتووە: گرتنی رۆژنامەنووسان دەبێ بە بڕیاری دادوەر و بە ئاگاداری سەندیکای رۆژنامەنووسانی کوردستان بێت.
ئەوەشی خستەڕوو: جەماوەری کوردستان بە گشتی و خەڵکی شەرەفمەندی زاخۆ، شاهێدی دەدەن کە ئیسلام کەشانی، سەرباری ئەوەی رۆژنامەنووسێکی بوێر و کارایە، هاوکات کەسایەتییەکی دڵسۆز و خێرخوازی ناوچەکەیە و رفاندنی بەم شێوازە ئەوەندەی تر ئەزموونی حوکمڕانی هەرێم دەخاتە ژێر پرسیارەوە.