بانکی رافیدەین جەژنانە بەسەر ٥٠ هه‌زار به‌شداربوو دابەشدەکات

01:09 2025-06-07 57725 عێراق 0

2025-06-07

57725

بانكی رافیده‌ین رایگەیاند دیاری جه‌ژن به‌سه‌ر زیاتر له‌ ٥٠ هه‌زار به‌شداربوودا دابەشدەکات، ئاماژەی بەوەکرد ئەم دیاریەش بۆ ئەو کەسانەیە كارتی ئه‌لیكترۆنی رافده‌ینیان بۆ پاشه‌كه‌وتكردن و بازاڕكردن له‌بری پاره‌ی نه‌ختینه‌یی به‌كارهێناوه‌.
‏
‏بانكی رافیده‌ین له‌ راگه‌یه‌ندراوێكدا بڵاویكرده‌وه‌، له‌ هه‌نگاوێكی تایبه‌تدا و به‌ ئامانجی پاڵپشتیكردنی كلتوری پاره‌دانی ئه‌لیكترۆنی و هاندانی هاوڵاتیان بۆ ده‌ستبه‌رداربوون له‌ مامه‌ڵه‌ی نه‌ختینه‌یی ته‌قلیدی، هه‌ڵمه‌تی "جه‌ژنی ئێوه‌ له‌سه‌ر ئێمه‌یه‌" ده‌ستپێده‌كه‌ن، كه‌مپینه‌كه‌ش بریتییه‌ له‌ دابه‌شكردنی خه‌ڵاتی نه‌ختینه‌ به‌سه‌ر هه‌زاران به‌شداربوو كه‌ كارتی ئه‌لیكترۆنی رافده‌ین كڕین و بازاڕكردن به‌كارده‌هێنن.
‏
‏ئاماژه‌ی به‌وه‌شكرد، ئه‌م ده‌ستپێشخه‌رییه‌ هاوته‌ریبه‌ له‌گه‌ڵ رێنماییه‌كانی سه‌رۆك وه‌زیرانی عێراق بۆ هاندانی بانكه‌كان و كۆمپانیاكانی پاره‌دان به‌مه‌به‌ستی په‌ره‌پێدانی میكانیزمی هاندانی كاریگه‌ر كه‌ به‌شداره‌ له‌ خێراكردنی گواستنه‌وه‌ بۆ ئابوورییه‌كی دیجیتاڵی بێ پاره‌ و گه‌شه‌سه‌ندنی كلتووری پاشه‌كه‌وتكردن و به‌كارهێنانی زیره‌كی ئامرازه‌ بانكییه‌ مۆدێرنه‌كان.
‏
‏روونیشیكرده‌وه‌، بانكی رافده‌ین به‌نیازه‌ جه‌ژنانه‌ به‌سه‌ر زیاتر له‌ ٥٠ هه‌زار بەشداربووی چالاكدا دابه‌ش بكات، به‌پێی سیسته‌مێكی چاودێری رێكخراو كه‌ ستانداردی وردی دادپه‌روه‌ری و شه‌فافیه‌ت له‌خۆده‌گرێت.