ئەحمەد شەرع هۆشداری لە شکستی پڕۆسەی یەکخستنی هێزەکانی هەسەدە دەدات

23:31 2025-09-19 47918 عەرەبی و نێودەوڵەتی 0

2025-09-19

47918

ئەحمەد شەرع، سەرۆکی سوریا هۆشداریدا کە شکستی پڕۆسەی یەکخستنی هێزەکانی سوریای دیموکرات (هەسەدە) لەگەڵ وەزارەتی بەرگری سوریا پێش کۆتایی ئەمساڵ، ڕەنگە تورکیا ناچار بکات بە جوڵەی سەربازی، و جەختی کردەوە کە "هەندێک گروپی لەناو هەسەدە ڕێگرن لە جێبەجێکردنی ڕێککەوتنەکان".

ئەحمەد شەرع، لە چاوپێكەوتنێكدا لەگەڵ ڕۆژنامەی "میللەت"ی توركیا ڕایگەیاند، داواکارییەکانی هەسەدەی پەیوەندیدار بە لامەرکەزییەت ڕەتدەكەینەوە و کە یاسای ژمارە 107ی سوریا لە بنەڕەتدا 90%ی لامەرکەزییەتی کارگێڕی گەرەنتی دەکات، داواكەی هەسەدە "تەنها پەردەیەکە بۆ مەیلی جیابونەوە".
شەرع باسی لەیەکەم دیداری خۆی لەگەڵ مەزڵوم عەبدی، فەرماندەی گشتی هەسەدە كردوە و پێ وتوە، "ئەگەر هاتبیت بۆ داواکردنی مافەکانی کورد، پێویست ناکات، چونکە باوەڕم بەوەیە كە ئەوەیە کە کورد هاوڵاتیی یەکسانی سوریان و من زیاتر لە تۆ دڵسۆزی مافەکانیانم".

ئەوەشیخستەڕو، ڕێککەوتنی 10ی ئازار بۆ یەکەمجار ڕێچکەیەکی چارەسەری دروست کرد کە لەلایەن ویلایەتە یەکگرتوەکانی ئەمریكا و تورکیاوە پشتیوانی لێدەکرا، بەڵام هەندێک گروپ لەناو "هەسەدە" و پەکەکە هەوڵیاندا ڕێگری لێ بکەن.
شەرع باسی لەوەشكرد، هەسەدە کە بانگهێشتی عەبدوڵا ئۆجەلانی بۆ هەڵوەشاندنەوەی خۆی پشتگوێ خست، بوەتە هەڕەشەیەک بۆ سەر ئاسایشی نەتەوەیی لە تورکیا و عێراقدا.

وتیشی، "ئەنقەرە پێشتر لە ئەنجامدانی ئۆپەراسیۆنە سەربازییەکانی دژی هەسەدە خۆی بەدور گرتوە و وەڵامی هەوڵەکانی سوریای داوەتەوە، بەڵام ڕەنگە تورکیا لەگەڵ کۆتایی ساڵدا لە توانایدا نەمێنێت ئارام بگرێت ئەگەر یەکخستنەکە بەدی نەیەت".